जालन्यात गॅस एजन्सीचे गोडाऊन फोडून 110 सिलिंडर चोरले; अज्ञात चोरट्यांविरोधात पोलीस ठाण्यात गुन्

जालना गॅस सिलेंडर बातम्या: जालना तालुक्यातील रामनगर परिसरात गॅस एजन्सीच्या गोडाऊनमध्ये  चक्क गॅस सिलिंडरची मोठी चोरी झाल्याचा प्रकार समोर आला आहे. आनंद भारत गॅस एजन्सीच्या उटवद शिवारातील गोडाऊनचे कुलूप तोडून चोरट्यांनी तब्बल 110 गॅस सिलिंडर लंपास केल्याने खळबळ उडाली आहे.

चोरीस गेलेल्या सिलिंडरची अंदाजे किंमत साडेचार लाख रुपयांपेक्षा अधिक आहे. विशेष म्हणजे एकीकडे नागरिकांना गॅस टंचाईचा सामना करावा लागत असताना हा प्रकार घडल्याने आश्चर्य व्यक्त होत आहे. या प्रकरणी एजन्सीचे व्यवस्थापक सिद्धार्थ आढाव यांनी मौजपुरी पोलिस ठाण्यात तक्रार दिली असून अज्ञात चोरट्यांविरोधात गुन्हा दाखल करण्यात आला आहे. सध्या पोलिसांकडून या चोरीचा अधिक तपास सुरू आहे.

जवळपास 4 लाख 51 रुपये किमतीचा मुद्देमालही चोरीला-

पोलीस सूत्रांच्या माहितीनुसार रविवारी गॅस एजन्सी बंद असताना मध्यरात्री ही चोरी झाल्याची शक्यता आहे. सोमवारी हा प्रकार उघडकीस आला. या घटनेत जवळपास 96 घरगुती सिलेंडर तसेच 12 निळ्या रंगाचे व्यावसायिक सिलेंडर आणि 5 किलोचे दोन व्यवसाय सिलेंडर असे एकूण 110 गॅस सिलेंडर चोरीला गेले आहेत, जवळपास 4 लाख 51 रुपये किमतीचा हा मुद्देमाल चोरीला गेला असून पोलिसांनी या प्रकरणाची सखोल चौकशी सुरू केली आहे.

घरगुती गॅस ग्राहकांसाठी e-KYC अनिवार्य- (एलपीजी ई-केवायसी)

पेट्रोलियम मंत्रालयाने सर्व घरगुती गॅस ग्राहकांसाठी ई-केवायसी (eKYC) अनिवार्य केले आहे. गॅस एजन्सीमध्ये जाण्याची गरज नाही. तुम्ही संबंधित ऑईल कंपनीचे अधिकृत ॲप आणि ‘Aadhaar FaceRD’ ॲप वापरून घरबसल्या ही प्रक्रिया काही मिनिटांत पूर्ण करू शकता. यामुळे तुमची गॅस सबसिडी विनाव्यत्यय सुरू राहील. घरगुती LPG ग्राहकांसाठी ई-केवायसी (e-KYC) अनिवार्य करण्यात आले असून, पेट्रोलियम मंत्रालयाने बायोमेट्रिक आधार प्रमाणीकरणाद्वारे हे पूर्ण करण्याचे आवाहन केले आहे. ही प्रक्रिया Indane, Bharat Gas किंवा HP Gas च्या मोबाइल ॲपद्वारे मोफत आणि घरबसल्या करता येते. यामुळे सबसिडी सुरू राहण्यास मदत होईल आणि गॅस पुरवठ्यातील अडचणी दूर होतील. ई-केवायसी प्रक्रिया पूर्णपणे मोफत आहे. सबसिडी मिळवण्यासाठी आणि गॅस सिलिंडर मिळण्यात अडचण येऊ नये यासाठी हे करणे आवश्यक आहे. मोबाईलवर काही मिनिटांतच ही प्रक्रिया पूर्ण करता येते.

राज्यासह देश-विदेशातील महत्वाच्या घडामोडी, Video:

संबंधित बातमी:

LPG e-KYC: घरगुती गॅस ग्राहकांसाठी e-KYC अनिवार्य, प्रक्रिया न केल्यास सबसिडी मिळणार नाही; जाणून घ्या, संपूर्ण प्रोसेस

आणखी वाचा