न्यायाधीश चैतन्यानंद प्रकरणातून माघार घ्या

वृत्तसंस्था/नवी दिल्ली

दिल्लीतील वसंत कुंज येथील श्री शारदा इन्स्टिट्यूट ऑफ इंडियन मॅनेजमेंटमध्ये 17 विद्यार्थ्यांवर लैंगिक अत्याचार केल्याचा आरोप असलेल्या चैतन्यानंद सरस्वती यांच्या जामीन अर्जावर गुरुवारी सुनावणी होणार होती. तथापि, सुनावणीच्या काही तास आधी न्यायाधीशांनी या प्रकरणातून माघार घेतली. चैतन्यानंद यांचा जामीन अर्ज अतिरिक्त सत्र न्यायाधीश अतुल अहलावत यांच्या खंडपीठासमोर दाखल करण्यात आला होता. आता ही याचिका पटियाला हाऊस कोर्टाच्या जिल्हा न्यायाधीशांसमोर सादर करण्याचे निर्देश देण्यात आले आहेत. दिल्ली पोलिसांनी चैतन्यानंद यांना 27 सप्टेंबर रोजी आग्रा येथून अटक केल्यानंतर सुरुवातीला त्यांना पाच दिवसांच्या रिमांडवर ठेवण्यात आले होते. त्यानंतर पटियाला हाऊस न्यायालयाने 3 ऑक्टोबर रोजी त्यांना 14 दिवसांच्या न्यायालयीन कोठडीत पाठवले होते. सद्यस्थितीत त्यांच्या कोठडीची मुदत 17 ऑक्टोबरपर्यंत आहे.