अर्वाच्च शिवीगाळ, कानाखाली मारली; नियम मोडल्याचा जाब विचारल्यानं कल्याणमध्ये दुचाकीस्वाराचा वाहतूक पोलिसावर हल्ला

विरुद्ध दिशेने आल्याचा जाब विचारला म्हणून दुचाकी चालकाने वाहतूक पोलिसाला अर्वाच्च शिविगाळ करत मारहाण केल्याचा प्रकार शहाडमध्ये घडला. या प्रकरणी वाहतूक पोलीस सचिन बबन ओमासे (वय – 33) यांनी महात्मा फुले चौक पोलीस स्थानकामध्ये तक्रार दाखल केली आहे. पोलिसांनी आरोपीविरुद्ध कलम 121(1), 132, 351(2) आणि 352 अन्वये गुन्हा दाखल करत तपास सुरू केला आहे.

फिर्यादी सचिन ओमासे हे कल्याण वाहतूक शाखेमध्ये गेल्या तीन वर्षापासून कार्यरत आहेत. शनिवारी रात्री ते कल्याण स्टेशन परिसरात वाहतूक नियम करत असताना शहाड ब्रिजवर वाहतूक कोंडी झाल्याची माहिती त्यांना ठाणे अंमलदाराने दिली. त्यामुळे ते शहाड जकात नाका येथे पोहोचले.

शहाड ब्रिजवर एक दुचाकी (क्र. एमएच 05, एफएल 9314) ही विरुद्ध दिशेने येत होती. ओमासे यांनी त्यास जाब विचारत गाडी बाजूला घेण्यास सांगितले. मात्र दुचाकीस्वाराने नकार दिल्याने वाहतुकीचे नियोजन करण्यासाठी ओमासे यांनी स्वत: ही दुचाकी बाजूला घेतली. याचा राग आल्याने दुचाकीस्वारने ओमासे यांच्या अंगावर धावून जात त्यांना अर्वाच्च शिविगाळ केली आणि मारहाण केली. तसेच ‘मी गाववावा केणे असून तुम्हाला बघून घेईन’, अशी धमकी देत रस्त्यावरील दगड उचलून मारण्याचा प्रयत्न केला. मात्र आजूबाजूच्या लोकांना त्याला रोखले, अशी फिर्याद ओमासे यांनी दिली असून पोलिसांनी दुचाकी चालक केणे याच्याविरुद्ध गुन्हा दाखल केला आहे.