धर्मस्थळाचे भयानक सत्य काय? 11 व्या स्थानावर सापडला मानवी सांगाडा, मुलीला दफन केल्याचा दावा, सफ

कर्नाटक: कर्नाटकातील प्रसिद्ध मंदिर शहर धर्मस्थळामध्ये गेल्या दोन दशकांपासून सुरू असलेल्या खून, बलात्कार आणि बेकायदेशीर दफनविधीच्या कथित प्रकरणांची चौकशी करणाऱ्या विशेष तपास पथकाला (एसआयटी) एका नवीन ठिकाणी मानवी सांगाड्याचे अवशेष सापडले आहेत, अशी माहिती पोलिस सूत्रांनी काल (सोमवारी,ता 4) दिली. एसआयटी सूत्रांनुसार, या मानवी अवशेषांमध्ये कवटीचे तुकडे आणि हाडे समाविष्ट आहेत. माहिती देणाऱ्या व्यक्तीला सोबत घेऊन तपास केलेल्या 11 व्या ठिकाणाहून जप्त करण्यात आले आहेत.

माहिती देणाऱ्याने आरोप केला आहे की त्याला धमकावण्यात आले आणि मंदिर आणि त्याच्या सभोवतालच्या जंगलात अनेक मृतदेह पुरण्यास भाग पाडण्यात आले. धर्मस्थळ हे पश्चिम घाटाच्या पायथ्याशी आहे आणि श्री मंजुनाथेश्वर मंदिरासाठी प्रसिद्ध आहे आणि कर्नाटकातील प्रमुख धार्मिक स्थळांपैकी एक आहे.

याप्रकरणाची माहिती देणाऱ्याने हे गंभीर आरोप केल्यानंतर या खळबळजनक प्रकरणाची चौकशी करण्यासाठी एसआयटीची स्थापना करण्यात आली. त्याने सांगितले की त्याने 20 वर्षांत जंगलात अनेक मृतदेह पुरले आहेत. माहिती देणाऱ्याची ओळख गुप्त ठेवण्यात आली आहे. यापूर्वी 31 जुलै रोजी, धर्मस्थळाजवळील नेत्रावती नदीच्या काठावर दुसऱ्या ठिकाणाहून एसआयटीला कवटी आणि हाडांचे तुकडे सापडले होते. 29 जुलैपासून एसआयटी विविध ठिकाणी खोदकाम करत आहे. आतापर्यंत सापडलेले सर्व सांगाडे वय, लिंग आणि मृत्यूचे कारण निश्चित करण्यासाठी फॉरेन्सिक सायन्स लॅबोरेटरी (FSL) मध्ये पाठवण्यात आले आहेत.

एकामागून एक सापडतायत सांगाड्याचे अवशेष

गेल्या आठवड्यात सुरू झालेल्या उत्खननादरम्यान एसआयटीने आतापर्यंत 13 संशयित दफनस्थळांपैकी 10 ठिकाणांची तपासणी पूर्ण केली आहे. सोमवारी, माजी स्वच्छता कर्मचाऱ्याने 11 व्या ठिकाणापासून सुमारे 100 मीटर अंतरावर असलेल्या बंगलगुडे येथील एका झाडाखाली एसआयटीला सांगाड्याचे अवशेष दाखवले. या अवशेषांमध्ये एक कवटी आणि काही हाडे होती, तसेच साडीचा एक तुकडा होता ज्याला गाठ बांधलेली होती. प्राथमिक तपासात असे दिसून आले आहे की, हे अवशेष एखाद्या पुरूषाचे असू शकतात, परंतु अंतिम पुष्टीसाठी ते फॉरेन्सिक सायन्स लॅबोरेटरीमध्ये पाठवण्यात आले आहेत.

यापूर्वी, 31 जुलै रोजी, एसआयटीला सहाव्या ठिकाणी नेत्रावती नदीच्या काठावर 15 हाडे आणि काही कवटीचे तुकडे असे अर्धवट सांगाडे आढळले होते. प्राथमिक फॉरेन्सिक विश्लेषणात हे अवशेष पुरुषांचे असल्याचे दिसून आले, जरी पूर्ण कवटी सापडली नाही. या शोधांमुळे संपूर्ण राज्याला हादरवून टाकणाऱ्या या प्रकरणात पहिला ठोस पुरावा मिळाला आहे.

हे संपूर्ण प्रकरण कसे उघडकीस आले?

माजी स्वच्छता कर्मचाऱ्याने पोलिसांकडे तक्रार दाखल केली होती, ज्यामध्ये त्याने असा दावा केला होता की मोठ्या लोकांच्या दबावाखाली त्याला अनेक मृतदेह दफन करण्यास भाग पाडले गेले. त्याने सांगितले की अनेक मृतदेहांवर लैंगिक हिंसाचार आणि हत्येच्या खुणा होत्या, त्यापैकी बहुतेक महिला आणि अल्पवयीन मुली होत्या, अशी माहितीही त्याने दिली होती. त्याने 13 संशयित दफनस्थळे ओळखली, त्यापैकी बहुतेक नेत्रावती नदीच्या काठावर होती.

तक्रारदाराने 3 जुलै रोजी तक्रार दाखल केली होती आणि 4 जुलै रोजी धर्मस्थळ पोलिस ठाण्यात भारतीय दंड संहितेच्या कलम 211(अ) अंतर्गत गुन्हा दाखल करण्यात आला. त्याने त्याच्या सुरक्षेसाठी साक्षीदार संरक्षण कायदा, 2018 अंतर्गत संरक्षण मागितले होते, जे 10 जुलै रोजी मंजूर करण्यात आले. त्यानंतर, 19 जुलै रोजी डीजीपी प्रणव मोहंती यांच्या नेतृत्वाखाली एसआयटी स्थापन करण्यात आली.

धमकी दिल्यामुळे मी इतके वर्षे गप्प होतो

1995 ते 2014 दरम्यान बलात्काराच्या पीडित मुली, महिला आणि पुरुषांचे जवळपास 100 मृतदेह वेगवेगळ्या ठिकाणी दफन केले होते, असा दावा सदर सफाई कर्मचाऱ्याने (Karnataka Mass Burial Case) केला. एका वरिष्ठ अधिकाऱ्याने जीवे मारण्याची धमकी दिल्यामुळे मी इतके वर्षे गप्प होतो, असं या सफाई कर्मचाऱ्याने म्हटलं आहे. सदर व्यक्ती धर्मस्थळस्थित एका प्रसिद्ध धार्मिक संस्थेत काम करत होता. त्यानं भारतीय नागरिक सुरक्षा संहितेच्या (बीएनएसएस) कलम 183 अंतर्गत मॅजिस्ट्रेटसमोर जबाब नोंदवला.

नेमकं प्रकरण काय? (Karnataka Mass Burial Case)

1995 ते 2014 पर्यंत धर्मस्थळ परिसरात सदर सफाई कामगार म्हणून काम करत होता. या काळात त्याला अनेक क्रूर हत्या केल्यानंतर मृतदेह दफन करण्यास भाग पाडण्यात आले. सफाई कामगाराने त्याच्या जबाबात असेही म्हटले आहे की पुरलेल्यांमध्ये 12 वर्षांपेक्षा कमी वयाच्या आणि शारीरिक आणि मानसिक छळ झालेल्या अनेक मुली होत्या. मी नग्न अवस्थेतील अनेक महिलांचे मृतदेह पाहिले, असंही हा सफाई कर्मचारी म्हणाला. सफाई कर्मचाऱ्यानं मॅजिस्ट्रेटसमोर जबाब नोंदवताना फोटो आणि पुरावेदेखील दिले.

आणखी वाचा