ILT20 2025 मध्ये एमआय एमिरेट्स संघाने दुबई कॅपिटल्सवर 8 विकेट्सनी शानदार विजय मिळवला. या सामन्यात दुबई कॅपिटल्सने प्रथम फलंदाजी करताना 20 षटकांत केवळ 122 धावा केल्या. त्यानंतर एमआय एमिरेट्सने कर्णधार कायरन पोलार्डच्या आक्रमक फलंदाजीच्या जोरावर हे लक्ष्य अवघ्या 16.4 षटकांत सहज गाठले.
दुबई कॅपिटल्सकडून फलंदाजी करताना कर्णधार मोहम्मद नबीने सर्वाधिक 22 धावा केल्या, तर जेम्स नीशामने 21 धावांचे योगदान दिले. मात्र, याशिवाय अन्य फलंदाजांना मोठी कामगिरी करता आली नाही. एकामागोमाग एक गडी बाद होत गेल्याने दुबईची संपूर्ण फलंदाजी कोलमडली आणि संघाला मर्यादित 122 धावांवरच समाधान मानावे लागले.
एमआय एमिरेट्सकडून गोलंदाजी करताना अल्लाह मोहम्मद गजनफरने अप्रतिम कामगिरी केली. त्याने 4 षटकांत 28 धावा देत 3 महत्त्वपूर्ण विकेट्स घेतल्या. त्याच्या अचूक गोलंदाजीमुळे दुबई कॅपिटल्सवर दबाव निर्माण झाला. याशिवाय फजलहक फारुकी, शाकिब अल हसन आणि अरब गुल यांनी प्रत्येकी एक विकेट घेतली.
लक्ष्याचा पाठलाग करताना एमआय एमिरेट्सची सुरुवात भक्कम झाली. मोहम्मद वसम आणि आंद्रे फ्लेचर यांनी पहिल्या विकेटसाठी 47 धावांची भागीदारी करत विजयाचा पाया रचला. त्यानंतर विकेटकीपर फलंदाज टॉम बँटनने 28 धावांची उपयुक्त खेळी केली, ज्यात एक षटकार आणि तीन चौकारांचा समावेश होता.
यानंतर कर्णधार कायरन पोलार्डने मैदानावर धडाकेबाज फलंदाजीचा जलवा दाखवला. पोलार्डने अवघ्या 31 चेंडूंमध्ये 44 धावा केल्या, ज्यात एक चौकार आणि पाच षटकारांचा समावेश होता. विशेष म्हणजे 15व्या षटकात पोलार्डने वकार सलामखेलच्या गोलंदाजीवर तब्बल 30 धावा ठोकल्या. या षटकात त्याने तीन चेंडूंवर सलग तीन लांबच लांब षटकार मारले, तर या फटकेबाजीचा व्हिडिओ सोशल मीडियावर जोरदार व्हायरल होत आहे.
दुबई कॅपिटल्सकडून हैदर अलीने एकमेव विकेट घेतली, मात्र इतर गोलंदाज प्रभाव पाडू शकले नाहीत. सामन्यातील उत्कृष्ट गोलंदाजीसाठी अल्लाह मोहम्मद गजनफरला ‘प्लेयर ऑफ द मॅच’ पुरस्काराने गौरवण्यात आले. या विजयासह एमआय एमिरेट्सने ILT20 2025 मध्ये आपली दावेदारी अधिक मजबूत केली आहे.
Comments are closed.