केकेआरच्या अडचणी वाढल्या, हर्षित राणा होऊ शकतो आयपीएल 2026 मधून बाहेर, मथिशा पाथिरानाच्या फिटनेसवरही प्रश्न

आयपीएल 2026 सुरू होण्यापूर्वी कोलकाता नाईट रायडर्सला मोठा फटका बसू शकतो. संघाचा स्टार वेगवान गोलंदाज हर्षित राणा दुखापतीमुळे संपूर्ण हंगामातून बाहेर असू शकतो, तर मथिशा पाथिरानाच्या तंदुरुस्तीबाबतही परिस्थिती स्पष्ट नाही.

22 मार्चपासून सुरू होणाऱ्या IPL 2026आधी कोलकाता नाईट रायडर्सच्या अडचणीत वाढ होताना दिसत आहे. टीम इंडियाचा स्टार वेगवान गोलंदाज हर्षित राणा दुखापतीमुळे संपूर्ण मोसमातून बाहेर असू शकतो. दिल्लीच्या वेगवान गोलंदाजाची T20 विश्वचषक 2026 साठी भारताच्या संघात निवड करण्यात आली होती, परंतु सराव सामन्यांमध्ये त्याला गुडघ्याला दुखापत झाली होती, ज्यामुळे तो स्पर्धेतून बाहेर पडला होता.

टाईम्स ऑफ इंडियाच्या अहवालानुसार, KKR सध्या राणाच्या संभाव्य बदलीच्या शोधात आहे, जरी फ्रँचायझीने अद्याप कोणतीही अधिकृत घोषणा केलेली नाही. दरम्यान, संघाने शुक्रवारी (13 मार्च) मुस्तफिझूर रहमानच्या जागी झिम्बाब्वेचा वेगवान गोलंदाज आशीर्वाद मुझाराबानीला करारबद्ध केले. विशेष म्हणजे बीसीसीआयच्या मार्गदर्शक सूचनांनुसार मुस्तफिझूरला संघातून मुक्त करण्यात आले.