भाजपमध्ये नाराजीचा स्फोट, आयारामांना तिकीट दिल्यानं निष्ठावंत कार्यकर्त्यांनी केलं बंड

लातूर महानगरपालिका निवडणूक लातूर शहर भाजपामध्ये तिकीट वाटपावरुन तीव्र नाराजी उफाळून आली आहे. अनेक वर्षांपासून पक्षासाठी काम करणाऱ्या निष्ठावंत कार्यकर्त्यांनी उघडपणे बंडाचे निशाण फडकावले आहे. आम्हीच खरे भाजपवाले असा ठाम दावा करत, बाहेरच्या पक्षातून आलेल्या ‘आयाराम’ उमेदवारांना तिकीट देण्यात आल्याचा आरोप कार्यकर्त्यांनी केला आहे. तर दुसरीकडे, जनसंघापासून पक्ष वाढवणारे जुने कार्यकर्ते तिकीटापासून वंचित राहिल्याने असंतोष अधिक तीव्र झाला आहे.

निष्ठावंतांच्या या आक्रमक भूमिकेमुळे लातूर भाजपातील अंतर्गत गोंधळ

लातूर महानगरपालिकेच्या 70 जागांसाठी झालेल्या तिकीट वाटपात निष्ठावंतांना डावलण्यात आल्याचा आरोप होत आहे. निवडणूक प्रचार प्रमुख आमदार संभाजी पाटील निलंगेकर यांच्या भूमिकेवरूनही कार्यकर्त्यांमध्ये नाराजी आहे. पक्षासाठी रात्रंदिवस झटणाऱ्यांवर अन्याय झाला, अशी भावना कार्यकर्त्यांनी व्यक्त केली. या पार्श्वभूमीवर जनसंघापासून काम करणारे, राष्ट्रीय स्वयंसेवक संघाशी संबंधित तसेच भाजपातील जुने, निष्ठावंत कार्यकर्ते लातूर येथील कल्पतरू मंगल कार्यालयात एकत्र आले. या बैठकीत एकमुखाने निर्णय घेण्यात आला की, आम्ही निवडणूक लढणार. लातूरमध्ये भाजप जिवंत ठेवली, मोठी केली आणि वाढवली ती आम्हीच. आमच्या अधिकारांवर आणि हक्कांवर गदा येत असेल तर त्याविरोधात लढा देणार,” असा ठाम निर्धार बैठकीत व्यक्त करण्यात आला. निष्ठावंतांच्या या आक्रमक भूमिकेमुळे लातूर भाजपातील अंतर्गत गोंधळ आणखी वाढण्याची शक्यता असून, आगामी निवडणुकीत याचे पडसाद उमटण्याची चिन्हे स्पष्ट दिसत आहेत.

भाजप टिकली आणि वाढली पाहिजे यासाठी आम्ही एकत्र आलोय

लातूर लोकसभा गेली, विधानसभा निवडणुकीत भाजप पराभव झाला. आता महानगरपालिकेत तेच करणार का? भाजप टिकली आणि वाढली पाहिजे यासाठी आम्ही एकत्र आलो आहोत. पक्षाचं काम याच कार्यकर्त्यांनी केलं होतं करत आहेत. त्यांना आम्ही काय उत्तर द्यायचं. निवडणुकीला आम्ही सामोरे जाणार असल्याचे मत राष्ट्रीय स्वयंसेवक संघाचे ज्येष्ठ स्वयंसेवक नितीनकुमार शेटे यांनी व्यक्त केले आहे. यावेळी कल्पतरू मंगल कार्यालयात मोठ्या प्रमाणात भाजपाचे कार्यकर्ते पदाधिकारी एकत्र आले होते. आम्ही मागील अनेक वर्षापासून निवडणुकीची तयारी केली आहे आणि आम्ही निवडणुकीला सामोरे जाणार हा निर्धार यावेळी व्यक्त करण्यात आला.

36 नगरसेवकापैकी तिकीट नाकारलेले भाजपाचे नगरसेवक

वर्षा कुलकर्णी प्रभाग क्रमांक 15
संजय रंदाळे प्रभाग क्रमांक 15
श्वेता लोंढे प्रभाग क्रमांक 15
कोमल वायचळकर क्रमांक 14
सुनील मलवाड प्रभाग क्रमांक 17
शिवकुमार वझे प्रभाग क्रमांक १४
नितीन वाघमारे प्रभाग क्रमांक 14
शकुंतला गाडेकर प्रभाग क्रमांक 16
देवानंद साळुंखे प्रभाग क्रमांक 12
भाग्यश्री कोळखेरे प्रभाग क्रमांक सहा
अजय दुढिले प्रभाग क्रमांक सहा
अजय कोकाटे प्रभाग क्रमांक 16
व्यंकट वाघमारे प्रभाग क्रमांक आठ
जान्हवी सूर्यवंशी प्रभाग क्रमांक आठ
विशाल जाधव प्रभाग क्रमांक 11
सरिता राजगिरे प्रभाग क्र.18
भाग्यश्री शेळके प्रभाग क्रमांक 18

तिकीट नाकारलेले या नगरसेवकांबरोबरच अनेक भाजपाचे निष्ठावंत इच्छुक कार्यकर्त्यांचं पक्षाने विचारच केला नाही. यामुळे लातूर भाजपामध्ये प्रचंड असंतोष पाहायला मिळत आहे.

आणखी वाचा