लखनऊ सुपर जायंट्सने (LSG) आयपीएल २०२६ च्या १० व्या सामन्यात सनरायझर्स हैदराबादचा (SRH) पराभव करून या हंगामातील आपला पहिला विजय नोंदवला. आयपीएलच्या इतिहासात हैदराबादविरुद्ध लखनऊचा हा पाचवा विजय आहे. शेवटच्या चेंडूपर्यंत रंगलेल्या या सामन्यात लखनऊने ५ गडी राखून रोमांचक विजय मिळवला. LSG च्या या विजयात कर्णधार ऋषभ पंतने सर्वात महत्त्वाची भूमिका बजावली. पंतने ५० चेंडूंत ९ चौकारांच्या मदतीने नाबाद ६८ धावा केल्या. पंतचे फॉर्ममध्ये परतणे ही टीमसाठी जशी आनंदाची बातमी आहे, तशीच एका खेळाडूने मात्र संघाची चिंता वाढवली आहे, ज्याला संघाने २१ कोटी रुपयांना रिटेन केले होते.
लखनऊ सुपर जायंट्सने आयपीएल २०२६ साठी धडाकेबाज फलंदाज निकोलस पूरनला २१ कोटी रुपये देऊन संघात कायम ठेवले होते. पूरनची गणना टी-२० फॉरमॅटमधील सर्वोत्तम फलंदाजांमध्ये केली जाते, त्यामुळे या हंगामातही लखनऊची टीम आणि चाहत्यांना त्याच्याकडून मोठ्या अपेक्षा होत्या. मात्र, यंदा पूरनची बॅट तळपलेली नाही. टी-२० क्रिकेटमध्ये पूरनने या वर्षी ९ डावांत फलंदाजी केली असून, त्यात त्याने १३.४४ च्या अत्यंत सामान्य सरासरीने केवळ १२१ धावा केल्या आहेत. या काळात त्याचा स्ट्राईक रेटही फक्त ११७.५ राहिला आहे. पूरनसारख्या फलंदाजासाठी ही आकडेवारी अत्यंत निराशाजनक आहे. अशा परिस्थितीत त्याच्या खराब फॉर्मने संघाचे टेन्शन वाढवले आहे.
सनरायझर्स हैदराबादविरुद्धच्या सामन्यात लखनऊने शेवटच्या षटकात कसाबसा विजय मिळवला असला, तरी आगामी सामन्यांमध्ये संघाला फलंदाजीत मोठी सुधारणा करण्याची गरज आहे. SRH विरुद्धच्या सामन्यात १५७ धावांचे लक्ष्य गाठताना फलंदाजांच्या नाकी नऊ आले होते. टॉप ऑर्डरच्या फलंदाजांनी लखनऊला चांगली सुरुवात करून दिली होती, पण आयुष बडोनी, निकोलस पूरन आणि अब्दुल समद यांसारख्या खेळाडूंनी निराशा केली. येणाऱ्या सामन्यांमध्ये लखनऊचा संघ आपल्या मधल्या फळीतील फलंदाजांकडून मोठ्या खेळीची अपेक्षा करेल.
SRH आणि LSG यांच्यातील सामन्याबद्दल बोलायचे झाले तर, हैदराबादने प्रथम फलंदाजी करताना ९ गडी गमावून १५६ धावा केल्या होत्या. हैदराबादसाठी नितीश रेड्डी आणि हेनरिक क्लासेन यांनी अर्धशतके झळकावली. दुसरीकडे, लखनऊने १५७ धावांचे लक्ष्य १९.५ षटकांत पूर्ण केले. LSG साठी ऋषभ पंतने नाबाद ६८ धावा केल्या, तर एडन मार्करमने २७ चेंडूत ४५ धावांचे योगदान दिले. आता पुढच्या सामन्यात लखनऊची टीम कशी कामगिरी करते, हे पाहणे महत्त्वाचे ठरेल.
Comments are closed.