लुथरा बंधूंना थायलंडमध्ये अटक करण्यात आली.

गोवा नाईटक्लब आगीप्रकरणी कारवाई : भारतात आणण्याची तयारी  : न्यायालयाने अंतरिम जामीन याचिका फेटाळली

वृत्तसंस्था/नवी दिल्ली, फुकेत

गोव्यातील बर्च नाईटक्लब आगीतील मुख्य आरोपी सौरभ लुथरा आणि गौरव लुथरा यांना थायलंडमध्ये अटक करण्यात आली आहे. भारतीय तपास यंत्रणा आता त्यांचे थायलंडमधून देशात प्रत्यार्पण करण्याची तयारी करत आहेत. आगीच्या घटनेनंतर काही तासांतच लुथरा बंधू थायलंडमध्ये पसार झाले होते. आता त्यांना भारतात परत आणले जाईल. आगीची घटना शनिवार-रविवार मध्यरात्री घडल्यानंतर अवघ्या पाचव्या दिवशी दोघाही मुख्य आरोपींना अटक करण्यात तपास यंत्रणांना यश आले आहे. त्यांच्याविरुद्ध सदोष हत्या आणि निष्काळजीपणाचा गुन्हा दाखल करण्यात आला आहे.

क्लब मालक सौरभ लुथरा आणि गौरव लुथरा यांना थायलंडमध्ये ताब्यात घेतल्यानंतर थायलंड पोलिसांनी त्यांचे हातकडी घातलेले आणि हातात पासपोर्ट असलेले दोघांचेही फोटो जारी केले आहेत. सूत्रांनी दिलेल्या माहितीनुसार, आता भारतीय अधिकाऱ्यांचे एक पथक थायलंडला रवाना झाले असून 24 तासांत त्यांना भारतात आणले जाणार आहे. देशात दाखल होताच गोवा पोलीस त्यांना ताब्यात घेण्याची शक्यता आहे. 6 डिसेंबर रोजी बर्च नाईटक्लबमध्ये लागलेल्या आगीत 25 जणांचा मृत्यू झाला होता. या घटनेनंतर लुथरा बंधू भारतातून पळून थायलंडला पोहोचले होते.

थायलंडमधील हॉटेलमधून ताब्यात

गौरव आणि सौरभ लुथरा यांना थायलंडमधील फुकेत येथील एका हॉटेलमध्ये ताब्यात घेण्यात आले होते. त्यांनी आगीची घटना घडल्यानंतर काही तासातच इंडिगोच्या विमानाने थायलंड गाठले होते. तपास यंत्रणांच्या म्हणण्यानुसार, अग्निशमन दलाचे पथक आग आटोक्यात आणण्याचा आणि गोव्यात त्यांच्या नाईटक्लबमध्ये अडकलेल्या लोकांना वाचवण्याचा प्रयत्न करत असताना सौरभ आणि गौरव लुथरा यांनी थायलंडला जाण्यासाठी विमान तिकिटे बुक केली. लुथरा बंधूंनी 6-7 डिसेंबरच्या रात्री 1:17 वाजता ऑनलाइन ट्रॅव्हल कंपनीच्या वेबसाइटवर लॉग इन करत तिकीट बुक केले. त्यानंतर पहाटे 5:30 वाजता इंडिगो फ्लाइट 6ई1073 मधून दोघेही दिल्लीहून फुकेतला रवाना झाले.

पासपोर्ट निलंबित

इंटरपोलने सौरभ आणि गौरव लुथरा यांच्याविरुद्ध ब्लू कॉर्नर नोटीस जारी केल्यानंतर परराष्ट्र मंत्रालयाने त्यांचे पासपोर्ट रद्द केले. गोवा सरकारकडून मंत्रालयाला त्यांचे पासपोर्ट रद्द करण्याची विनंती करणारे पत्र मिळाले होते. सध्या दोन्ही आरोपींचे पासपोर्ट निलंबित करण्यात आले असून परराष्ट्र मंत्रालयाने त्यांचे पासपोर्ट रद्द करण्याचे आदेश दिले होते. गोवा सरकारच्या विनंतीवरून ही कारवाई करण्यात आली आहे.

दिलासा देण्यास न्यायालयाचा नकार

गोव्यातील ‘बर्च बाय रोमियो लेन’ नाईटक्लबचे मालक सौरभ आणि गौरव लुथरा यांनी दिल्लीतील न्यायालयात अंतरिम दिलासा मागण्याचा प्रयत्न केला होता. न्यायालयाने बुधवारी त्यांच्या ट्रान्झिट अॅन्टिसिपेटरी जामीन अर्जावरील सुनावणी पुढे ढकलली होती. त्यानंतर गुरुवारी अंतरिम जामीन याचिका फेटाळण्याचा निर्णय न्यायालयाने जाहीर केल्यामुळे आता ते चौकशीच्या फेऱ्यात अडकणार आहेत.  दोन्ही आरोपींनी चार आठवड्यांच्या अटकपूर्व जामिनासाठी अर्ज केला होता.

दिल्ली पोलिसही पोलिसांचे समर्थन तपासतात

लुथरा बंधू यांच्यासह त्यांचे व्यावसायिक भागीदार, व्यवस्थापक आणि काही कर्मचारी दिल्लीचे रहिवासी आहेत. त्यामुळे या प्रकरणात दिल्ली पोलीस आता गोवा पोलिसांसह आगीच्या घटनेचा तपास करत आहेत. याप्रकरणी दिल्लीतही खटला दाखल करण्यात आला आहे.