. डेस्क– उत्तर प्रदेशातील राज्यसभा निवडणुकीच्या पार्श्वभूमीवर बसपा प्रमुख मायावती यांनी समाजवादी पक्षावर निशाणा साधला. सपा स्वत:ला पीडीए म्हणजेच मागास, दलित आणि अल्पसंख्याक वर्गाचा पक्ष म्हणवते, पण तिकीट वाटपात घराणेशाही आणि बड्या भांडवलदारांना प्राधान्य देते, असा आरोप मायावतींनी केला.
राम गोपाल यादव आणि धनराज परिमल नाथवानी यांच्या राज्यसभेच्या उमेदवारीचा दाखला देत मायावती म्हणाल्या की, सपाला पीडीएच्या मतांची गरज आहे, पण खासदार आणि आमदार बनवण्यासाठी कुटुंबातील सदस्य आणि बड्या भांडवलदारांना तिकिटे दिली जातात. मायावती म्हणाल्या की बसपा कोणत्याही निवडणुकीत आपले कुटुंब, नातेवाईक किंवा भाऊ-पुतण्यांना तिकीट देण्याचे धोरण स्वीकारत नाही. त्यांच्या म्हणण्यानुसार, पक्ष गरीब, मध्यमवर्गीय आणि दुर्बल घटकातील कष्टकरी आंबेडकरी कार्यकर्त्यांना उमेदवारी देतो.
राम गोपाल यादव हे सपा अध्यक्ष अखिलेश यादव यांचे काका असून पक्षाने त्यांना पुन्हा राज्यसभेचे उमेदवार केले आहे. तर धनराज परिमल नाथवानी हे रिलायन्स इंडस्ट्रीजशी संबंधित वरिष्ठ कॉर्पोरेट अधिकारी आहेत आणि ते गुजरात क्रिकेट असोसिएशनचे अध्यक्षही आहेत.
मायावतींनी सपाच्या संभाव्य तिसऱ्या राज्यसभेच्या उमेदवाराचाही समाचार घेतला. तिसरा उमेदवार फेस सेव्हिंग असू शकतो आणि पहिल्याप्रमाणेच निवडणूक हरू शकतो, असा दावा त्यांनी केला. दलित, आदिवासी, अत्यंत मागासलेले, मुस्लिम, इतर धार्मिक अल्पसंख्याक आणि गरीब उच्चवर्णीय समुदायातील लोकांना 2027 च्या विधानसभा निवडणुकीच्या पार्श्वभूमीवर बसपमध्ये सामील होण्याचे आवाहनही त्यांनी केले.
Comments are closed.