पावसाळी अधिवेशनापूर्वी मोदी मंत्रिमंडळात फेरबदल

तरुण चुघ, राघव चड्ढा यांना संधी शक्य : काही निष्क्रिय मंत्र्यांना हटवणार

वृत्तसंस्था/ नवी दिल्ली

राज्यसभा निवडणुकीनंतर आणि पावसाळी अधिवेशनापूर्वी पंतप्रधान नरेंद्र मोदी यांच्या मंत्रिमंडळात फेरबदल होण्याची चर्चा वाढत आहे. संभाव्य विस्तारामध्ये पंजाबमधील मंत्र्यांची संख्या वाढू शकते. राज्यसभेवर नामनिर्देशित करण्यात आलेले नेते तरुण चुघ यांचा केंद्रीय मंत्रिमंडळात समावेश केला जाऊ शकतो. चुघ यांना संधी मिळाल्यास पंजाब विधानसभा निवडणुकीत पक्षाला थेट फायदा होऊ शकतो. गेल्या काही वर्षांत चुघ हे भाजप नेतृत्वाचे विश्वासू नेते म्हणून उदयास आले आहेत. तसेच आम आदमी पार्टी सोडून भाजपमध्ये सामील झालेल्या राघव चड्ढा यांनाही मंत्री म्हणून नियुक्त केले जाण्याची शक्यता आहे. या परिस्थितीत विधानसभा निवडणुकीपूर्वी पंजाबला दोन नवीन मंत्री मिळू शकतात, अशी चर्चा आहे.

पश्चिम बंगालमधील विजयानंतर भाजपने आता पुढील वर्षी विधानसभा निवडणुका होणाऱ्या पंजाबवर अधिक लक्ष केंद्रित केले आहे. यासंदर्भात पंजाबमधून नवीन चेहरे मंत्रिमंडळात सामील होण्याची शक्यता वाढली आहे. राघव चड्ढा यांच्या नेतृत्वाखाली ‘आप’चे सात राज्यसभा सदस्य अलिकडेच भाजपमध्ये सामील झाले आहेत. भाजपने रवनीत सिंग बिट्टू यांना राज्यसभेवर पुन्हा उमेदवारी दिलेली नाही. पंतप्रधान नरेंद्र मोदी यांच्या नेतृत्वाखालील केंद्रीय मंत्रिमंडळात रवनीत सिंग बिट्टू हे पंजाबमधील एकमेव सदस्य आहेत. ते रेल्वे आणि अन्न प्रक्रिया उद्योग राज्यमंत्री म्हणून कार्यरत आहेत. सध्याच्या वृत्तानुसार, रवनीत सिंग बिट्टू विधानसभा निवडणूक लढवू शकतात.

केंद्रीय गृहमंत्री अमित शाह पंजाबमधील परिस्थितीचा आढावा घेण्यासाठी सातत्याने आढावा बैठका घेत आहेत. त्यांच्या या रणनीतीमुळे आगामी विधानसभा निवडणुकीत भाजप एका मजबूत स्थितीत रिंगणात उतरू शकेल. काही दिवसांपूर्वी हरभजन सिंग आणि त्यानंतर विक्रमजीत सिंग साहनी यांनी अमित शाह यांची भेट घेतली होती. या भेटीनंतर अन्य राजकीय घडामोडींनाही वेग आल्यामुळे मंत्रिमंडळ फेरबदलाची चर्चा पुन्हा सुरू झाली आहे. संसदेच्या 2026 च्या पावसाळी अधिवेशनाच्या संभाव्य तारखा 21 जुलै ते 12 ऑगस्ट 2026 दरम्यान असण्याची शक्यता आहे. संसदीय कामकाज मंत्रालयाने अद्याप याची अधिकृत घोषणा केली नसली तरी केंद्रीय मंत्रिमंडळाच्या फेरबदलादरम्यान अनेक मोठे बदल होण्याची शक्यता आहे.

तरुण चुघ हे अमृतसरचे रहिवासी

भाजपने तरुण चुघ यांना मध्य प्रदेशमधून राज्यसभेसाठी उमेदवारी दिली आहे. ते पंजाबमधील अमृतसरचे रहिवासी असून भाजपचे राष्ट्रीय सरचिटणीसही आहेत. ते पक्षाच्या प्रमुख रणनीतिकारांपैकी एक मानले जातात. तसेच ते संघटनात्मक काम उत्तमपणे पाहतात. त्यांनी यापूर्वी जम्मू काश्मीर, लडाख आणि तेलंगणा यांसारख्या राज्यांमध्ये भाजपचे प्रभारी आणि सह-प्रभारी म्हणून काम केले आहे.  ते राष्ट्रीय स्वयंसेवक संघाच्या कार्यप्रणालीतून आले आहेत. ते वयाच्या नवव्या वर्षी आरएसएसमध्ये सामील झाले. त्यानंतर ते अभाविप आणि नंतर ‘भाजयुमो’मध्ये सक्रिय झाल्यामुळे त्यांना व्यापक संघटनात्मक अनुभव मिळाला. ते उच्चशिक्षित असून त्यांच्याकडे एमबीएची पदवी आहे.