टी-२० वर्ल्ड कप २०२६ मध्ये पाकिस्तानची कामगिरी अत्यंत खराब राहिली. संघाचा प्रवास सेमीफायनलपूर्वीच संपला. लीग स्टेजमध्येही पाकिस्तानने सरासरी कामगिरी केली होती. पाकिस्तानने केवळ कमकुवत संघांचा पराभव केला, तर भारताकडून त्यांना पराभवाचा सामना करावा लागला होता. विश्वचषकातील या खराब कामगिरीनंतर पाकिस्तान क्रिकेट बोर्डाचे (PCB) अध्यक्ष मोहसिन नकवी अजिबात आनंदी नाहीत.
टूर्नामेंट सुरू होण्यापूर्वी निवडकर्ते आणि व्यवस्थापनाने मोहसिन नकवी यांना आश्वासन दिले होते की, संघ विश्वचषकात चांगली कामगिरी करेल. ‘टाइम्स ऑफ इंडिया’शी बोलताना एका सूत्राने सांगितले की, “नकवी प्रचंड नाराज आहेत, कारण यावेळी निवडकर्ते, संघ व्यवस्थापन आणि त्यांच्या जवळच्या सहकाऱ्यांनी त्यांना खात्री दिली होती की संघ विश्वचषकात चमक दाखवेल. सलमान अली आगा, बाबर आझम, उस्मान खान आणि काही इतर खेळाडूंच्या टी-२० आंतरराष्ट्रीय कारकिर्दीचा या विश्वचषकानंतर अंत होऊ शकतो.” विश्वचषकानंतर पाकिस्तानच्या टी-२० सेटअपमध्ये मोठ्या बदलांची अपेक्षा वर्तवण्यात येत आहे.
मिळालेल्या माहितीनुसार, सलमान अली आगा आणि बाबर आझम यांना संघातून डच्चू दिला जाऊ शकतो. सूत्राने पुढे सांगितले की, माईक हेसन यांनी नकवी यांना असा सल्ला दिला आहे की, पाकिस्तानने काही वरिष्ठ खेळाडूंना संघातून काढून टाकले पाहिजे आणि तरुण प्रतिभेवर (Young Talent) गुंतवणूक करून आधुनिक टी-२० क्रिकेटच्या बदलत्या गरजांनुसार स्वतःला जुळवून घेतले पाहिजे.
सुपर-८ मध्ये पाकिस्तानचा पहिला सामना न्यूझीलंडविरुद्ध होणार होता, परंतु पावसामुळे हा सामना रद्द झाला आणि दोन्ही संघांना प्रत्येकी १-१ गुण देण्यात आला. त्यानंतर पाकिस्तानला इंग्लंडकडून पराभव स्वीकारावा लागला. दरम्यान, सुपर-८ च्या शेवटच्या सामन्यात पाकिस्तानने श्रीलंकेविरुद्ध ५ धावांनी विजय मिळवला, परंतु खराब धावगतीमुळे (Net Run Rate) पाकिस्तानला सेमीफायनलमध्ये स्थान मिळवता आले नाही.
Comments are closed.