पाच वेळा आयपीएल विजेता राहिलेल्या मुंबई इंडियन्स संघाचा यंदाच्या मोसमातील पहिला सामना 23 मार्च रोजी चेन्नई सुपर किंग्ज विरुद्ध होणार आहे. जरी आता एम.एस. धोनी सीएसकेचा कर्णधार नसला आणि रोहित शर्मा मुंबई इंडियन्सचे नेतृत्व करत नसला, तरीही ह्या दोन संघांतील लढत क्रिकेट चाहत्यांसाठी नेहमीच आकर्षणाचा केंद्रबिंदू राहिली आहे.
यंदा मुंबई इंडियन्सला आपल्या पहिल्याच सामन्यात एक मोठा विक्रम मोडण्याचे आव्हान आहे. 2012 पासून मुंबई इंडियन्सला त्यांच्या आयपीएल मोसमाच्या पहिल्या सामन्यात विजय मिळवता आलेला नाही. विशेषतः, 2022 मध्ये तर पहिला विजय मिळवण्यासाठी संघाला तब्बल 9 सामने वाट पाहावी लागली होती. मात्र एकदा संघ फॉर्मात आला की, त्यांना रोखणे विरोधी संघांसाठी कठीण ठरते.
या मोसमात मुंबई इंडियन्स आपल्या पहिल्या दोन लढती प्रतिस्पर्धी संघांच्या घरच्या मैदानावर खेळणार आहे.
पहिला सामना: 23 मार्च – चेन्नई सुपर किंग्ज विरुद्ध, चेपॉक स्टेडियम, चेन्नई
दुसरा सामना: 29 मार्च – गुजरात टायटन्स विरुद्ध, नरेंद्र मोदी स्टेडियम, अहमदाबाद
तिसरा सामना: 31 मार्च – कोलकाता नाइट रायडर्स विरुद्ध, वानखेडे स्टेडियम, मुंबई
विशेषतः, चेन्नईतील चेपॉक स्टेडियम हा सीएसकेचा बालेकिल्ला मानला जातो, त्यामुळे मुंबईसाठी हा सामना खडतर असणार आहे. मात्र, सूर्यकुमार यादवच्या नेतृत्वाखाली संघ हा मिथक मोडू शकतो का? याकडे सर्वांचे लक्ष राहणार आहे.
मुंबईला यंदा विजयाची चांगली सुरुवात करून संघाचा आत्मविश्वास वाढवायचा आहे. पहिले दोन सामने जिंकूनच वानखेडेवर परतण्याचा संघाचा प्रयत्न असेल. मुंबई इंडियन्सला हा ऐतिहासिक अडथळा पार करता येतो का, हे पाहणे रंजक ठरेल.
खरं तर, यावर्षी मुंबईच्या समस्या वाढल्या आहेत कारण कर्णधार हार्दिक पांड्या एका सामन्याच्या बंदीला सामोरे जात आहे, तर जसप्रीत बुमराह देखील पहिल्या काही सामन्यांना मुकणार आहे. अशा परिस्थितीत कर्णधारपदाची जबाबदारी सूर्यकुमार यादववर आली आहे. सूर्यकुमार यादव हा टी मध्ये टीम इंडियाचा कर्णधार आहे, पण त्याने आयपीएलमध्ये फार कमी कर्णधारपद भूषवले आहे.
2023 मध्ये त्याने मुंबई इंडियन्सचे नेतृत्व केले आणि तो सामना जिंकण्यातही तो यशस्वी झाला. सूर्याने ही मालिका सुरू ठेवावी आणि पहिला सामना जिंकण्याचा मिथक मोडावा अशी चाहत्यांना इच्छा असेल. हार्दिक पांड्या आणि जसप्रीत बुमराह यांच्या अनुपस्थितीत मुंबई इंडियन्सचा संघ पहिल्या सामन्यात कशी कामगिरी करतो हे पाहणे बाकी आहे.
Comments are closed.