IPL 2026 आयपीएल २०२६ मधील चॅम्पियन मुंबई इंडियन्सचा २९ मार्चला पहिला सामना खेळणार आहे. मुंबईचा पहिलाच सामना कोलकाता नाईट रायडर्सविरूद्ध होणार आहे. मात्र, या सामन्यासाठी दोन खेळाडू अनुपलब्ध असतील. ईएसपीएनक्रिकइन्फोच्या वृत्तानुसार, काही दिवसांपूर्वी वानखेडे स्टेडियमवर झालेल्या संघाच्या सराव सत्रात दोन्ही खेळाडू अनुपस्थित होते. यानंतर आता दोघेही केकेआरविरुद्ध खेळण्याची शक्यता कमी आहे.
मुंबई इंडियन्सचा स्पर्धेतील सलामीचा सामना घरच्या मैदानावर म्हणजेच मुंबईतील वानखेडे स्टेडियममध्ये होणार आहे. संघाचा महत्त्वाचा गोलंदाज जसप्रीत बुमराह उशिरा संघात दाखल झाला आहे, पण तो फिट असून केकेआरविरूद्ध पहिला सामना खेळणार आहे. पण मिचेल सँटनर आणि विल जॅक्स मुंबईसाठी पहिल्या सामन्यात खेळणार नसल्याची माहिती समोर येत आहे.
मिचेल सँटनरने नुकतंच न्यूझीलंडला टी-२० विश्वचषकाच्या अंतिम फेरीत पोहोचवलं होतं. इतकंच नाही, तर तो दक्षिण आफ्रिकेविरुद्धच्या पाच सामन्यांच्या टी-२० आंतरराष्ट्रीय मालिकेतही खेळला होता. त्याने पहिल्या तीन सामन्यांमध्ये खेळल्यानंतर शेवटच्या दोन सामन्यांसाठी त्याला विश्रांती देण्यात आली, ज्यात न्यूझीलंडचा ३-२ असा पराभव झाला. तो लवकरच मुंबई संघात सामील होण्याची शक्यता असली तरी, तो भारतात आयपीएलसाठी कधी दाखल होणार, याबाबत माहिती मिळालेली नाही.
दरम्यान, विल जॅक्स वैयक्तिक कारणांमुळे अजूनही मुंबई संघात दाखल झालेला नाही आणि त्याला संघात सामील होण्यासाठी अधिक वेळ लागू शकतो. या इंग्लंडच्या अष्टपैलू खेळाडूने टी-२० विश्वचषकात उत्कृष्ट कामगिरी केली होती आणि संघाच्या उपांत्य सामन्यात महत्त्वाची भूमिका बजावली होती, जिथे वानखेडे स्टेडियमवर त्यांना भारताकडून पराभव पत्करावा लागला होता. या दोन्ही खेळाडूंच्या अनुपस्थितीमुळे स्पर्धेच्या सुरुवातीला मुंबईच्या संघ संतुलनावर परिणाम होऊ शकतो.
मिचेल सँटनरकडे उत्कृष्ट फिरकीपटू आहे तर विल जॅक्स मधल्या फळीत खालच्या क्रमांकावर उपयुक्त षटकं टाकतो आणि फलंदाजीतही प्रभावी कामगिरी करतो. सातत्यपूर्ण पर्यायांच्या अभावामुळे, मुंबईला सलामीच्या सामन्यासाठी आपल्या संघात बदल करावा लागू शकतो. केकेआरविरुद्ध, मुंबई मिचेल सँटनरच्या जागी युवा अफगाण फिरकी गोलंदाज अल्लाह गझनफरला संधी देऊ शकते. तो मधल्या षटकांमध्ये सामन्यावर नियंत्रण मिळवू शकतो.
याव्यतिरिक्त, विल जॅक्सच्या जागी शेरफेन रदरफोर्ड हा एक चांगला पर्याय आहे. गुजरात टायटन्सकडून मुंबई संघात सामील झालेल्या या अष्टपैलू खेळाडूकडे जोरदार फटकेबाजी करण्याची क्षमता आहे. तो खालच्या फळीत फलंदाजीची जबाबदारीही सांभाळू शकतो. सँटनरने टी-२० विश्वचषक स्पर्धेत उत्कृष्ट कामगिरी केली होती, त्याने आठ सामन्यांमध्ये १४० पेक्षा जास्त स्ट्राइक रेटने १२० धावा केल्या होत्या आणि गोलंदाजीनेही महत्त्वपूर्ण योगदान दिले होते.
Comments are closed.