मुंबईत दररोज निर्माण होणाऱ्या कचऱ्याचे वहन करण्यासाठी पालिकेने अत्याधुनिक मिनी कॉम्पॅक्टर गाड्या आणल्या आहेत. या गाड्यांमध्ये एकाच वेळी 5 टन कचऱ्याचे वहन करता येणार असून इंधनाची बचत आणि जादा कचऱ्याचे वहन करता येणार आहे. पालिकेच्या घनकचरा विभागाच्या ताफ्यात सध्या 30 मिनी कॉम्पॅक्टर आणले गेले आहेत.
मुंबईतील कचऱ्याच्या वहनाची दीर्घ प्रक्रिया लक्षात घेता पालिका आयुक्त भूषण गगराणी यांनी अद्ययावत वाहने घेण्याच्या सूचना घनकचरा विभागाला दिल्या होत्या. त्यानुसार नव्या गाड्यांमध्ये कर्मचाऱ्यांच्या सुरक्षेसाठी योग्य आसन व्यवस्था, ओला व सुका कचऱ्यांसाठी स्वतंत्र कप्पे यामुळे मिनी कॉम्पॅक्टरचे आयुष्यमान वाढण्यास मदत होणार असल्याचे अतिरिक्त महानगरपालिका आयुक्त अश्विनी जोशी यांनी सांगितले.
असा होणार फायदा
नव्या वाहनांमध्ये 5 मिमी जाडीच्या ‘हाडॉक्स’ स्टील मटेरियलचे फ्लोरिंग वापरले आहे. परिणामी वाहनाचे आयुष्यमान वाढण्यास मदत होणार आहे. तसेच हायड्रॉलिक पद्धतीच्या क्लोजिंग प्लेट कव्हरमुळे वाहनाची मागील बाजू पूर्णपणे बंदिस्त राहणार असल्याची माहिती घनकचरा व्यवस्थापन उपायुक्त किरण दिघावकर यांनी दिली. आगामी काळात वाहनांचा रंग पाढरा आणि निळा अशा रंगसंगतीत बदलला जाईल, असेही ते म्हणाले.
Comments are closed.