Mumbai News – महिलेच्या पोटातून काढला तब्बल 10.4 किलो वजनाचा ट्यूमर, सेंट जॉर्जमध्ये यशस्वी शस्त्रक्रिया

सीएसएमटी येथील सेंट जॉर्ज रुग्णालयात एका 40 वर्षीय महिलेच्या पोटातून तब्बल 10.4 किलो वजनाचा ट्यूमर काढण्यात आला आहे. मीना सोलंकी असे महिलेचे नाव असून ती दक्षिण मुंबईतील क्रॉफर्ड मार्केटमधील रहिवासी आहे. महिलेच्या पोटातून काढलेला ट्यूमर हिस्टोपॅथॉलॉजी चाचणीसाठी पाठवण्यात आला आहे. सेंट जॉर्जचे डॉक्टर सध्या हिस्टोपॅथॉलॉजी अहवालाची वाट पाहत आहेत. या चाचणीत जर कर्करोगाचे निदान झाले तर केमोथेरपीची आवश्यकता असेल डॉक्टर म्हणाले.

मीना सोलंकी ही अविवाहित असून क्रॉफर्ट मार्केट परिसरात आई आणि भावासोबत राहते. तिला काही महिन्यांपासून काही खाल्ल्यानंतर उलट्या होत होत्या आणि अशक्तपणाचा त्रास जाणवत होता. यानंतर एका सामाजिक कार्यकर्तीने तिला सेंट जॉर्ज रुग्णालयात तपासणीसाठी आणले. यावेळी तपासणीत तिच्या गर्भाशयात ट्यूमर असल्याचे कळले.

पाच ते सहा बाळांना सामावून घेण्याएवढी जागा या ट्यूमरने व्यापली होती. या ट्यूमरमुळे महिलेच्या फुफ्फुसे, यकृत, हृदय, मूत्रपिंड आणि रक्तवाहिन्यांवर दबाव येत होता, असे सेंट जॉर्जच्या डॉक्टर राजश्री कटके यांनी सांगितले. सेंट जॉर्जमधील डॉक्टरांच्या टीमने महिलेवर यशस्वी शस्त्रक्रिया करत तिच्या पोटातून ट्यूमर बाहेर काढला.