मुंबई मेट्रो न्यूज : मुंबई, पुणे, नागपूर या शहरांमध्ये मेट्रो आल्याने सर्वसामान्यांचा प्रवास वेगवान झाला आहे. मेट्रोमुळे मुंबई पुण्यातील वाहतूक कोंडी नियंत्रणात आली आहे. त्यामुळे या शहरांमध्ये मेट्रोचे जाळे वाढविण्यावर प्रशासन सातत्याने भर देत आहे.
दरम्यान, मुंबईकरांसाठी एक महत्त्वाची बातमी समोर आली आहे. येत्या काही वर्षांत राजधानीतील नागरिकांचा प्रवास अधिकच सुपरफास्ट होणार आहे. कारण महाराष्ट्राच्या राजधानीलाही आणखी एक नवीन मेट्रो मार्ग मिळणार असल्याची बातमी समोर आली आहे.
मुंबई मेट्रो रेल कॉर्पोरेशनच्या माध्यमातून आता प्रस्तावित वडाळा ते गेटवे ऑफ इंडिया या मेट्रो मार्गावर लक्ष केंद्रित करण्यात आले आहे. या महत्त्वाच्या प्रकल्पासाठी अंतरिम सल्लागार नेमण्याची प्रक्रियाही सुरू झाली आहे.
या प्रक्रियेअंतर्गत अंतरिम सल्लागार म्हणून नियुक्त होणारी कंपनी नियोजन, रचना, बांधकाम पर्यवेक्षण आणि गुणवत्ता नियंत्रण यासारखी महत्त्वाची कामे पार पाडेल. सल्लागार प्रकल्पाचे काम वेळेत आणि प्रस्थापित मानकांनुसार पूर्ण होत आहे की नाही यावर देखरेख ठेवण्याची जबाबदारीही संबंधित सल्लागाराची असेल.
प्रकल्पासाठी निविदा तयार करण्यासाठी सल्लागार प्राधिकरणाला मदत करेल. पण कन्सल्टंटचे मुख्य काम बांधकामावर बारकाईने लक्ष ठेवणे हे असेल. दरम्यान, सल्लागाराची नियुक्ती झाल्यानंतर इतर निविदा प्रक्रिया पुढे सरकणार असल्याची माहिती अधिकाऱ्यांनी दिली आहे.
आम्ही तुम्हाला कळवू इच्छितो की MMRC ने या नियुक्तीसाठी निविदा मागवल्या आहेत. यासाठी ४ नोव्हेंबरला प्री-बिड बैठक होणार आहे.तसेच कंपन्या ३ डिसेंबरपर्यंत अर्ज करू शकतात.दरम्यान, या नव्या प्रस्तावित मेट्रो मार्ग प्रकल्पामुळे वडाळा ते गेटवे ऑफ इंडिया हा प्रवास वेगवान होणार आहे.
शहरातील पहिल्या भूमिगत मेट्रो मार्गाचे काम पूर्ण झाल्यानंतर आता या दुसऱ्या प्रकल्पाकडे अधिक लक्ष दिले जात असून हा प्रकल्पही नियोजित वेळेत पूर्ण करण्याची तयारी प्राधिकरणाने केली आहे.
Comments are closed.