मुशीर खानकडून 77 वर्ष जुन्या रेकॉर्डची बरोबरी! रवी शास्त्रींच्या खास क्लबमध्येही मुंबईच्या खेळाडूची एंट्री

रणजी ट्रॉफी २०२६-२७ मध्ये मुंबईचा अष्टपैलू मुशीर खानने उल्लेखनीय कामगिरीने सुवर्णाक्षरात आपल्या नावाची नोंद केली आहे. त्याने हरियाणाविरुद्धच्या सामन्यात आधी तर शतकी खेळी केली आणि नंतर गोलंदाजीमध्येही कहर केला. त्याने तब्बल ६ विकेट्स घेतल्या. त्याच्या या जबरदस्त कामगिरीमुळे मुंबई विजयाच्या उंबरठ्यावर पोहोचला आहे. त्याचबरोबर मुशीरने ७७ वर्ष जुन्या विक्रमाची बरोबरी केली.

मुशीर भारतीय क्रिकेटपटू सरफराज खानचा धाकटा भाऊ आहे. मुंबई आणि हरियाणा यांचा सामना मुंबईच्या वांद्रे-कुर्ला कॉम्प्लेक्स येथील शरद पवार अकॅडमीमध्ये (२६ ते ३० ऑक्टोबर) खेळला जात आहे. या सामन्यातील मुंबईच्या पहिल्या डावात फलंदाजी करताना मुशीरने १०९ धावा केल्या होत्या. हे त्याचे प्रथम श्रेणीतील चौथे शतक होते. त्यामुळे मुंबईने पहिल्या डावात ४३० धावांचा डोंगर उभा केला.

हरियाणा जेव्हा फलंदाजीसाठी मैदानात उतरला तेव्हा मुशीरने आपल्या फिरकीने त्यांना धक्के दिले. त्याने या हरियाणाच्या पहिल्या डावात ३१ षटकांत ८५ धावा देत ६ विकेट्स घेतल्या. यामध्ये त्याने ७ षटके निर्धाव टाकली. त्यामुळे पाहुण्या संघाचा पहिला डाव २७० धावसंख्येवरच संपुष्टात आला. यामुळे त्यांना फॉलो-ऑन मिळाला आणि हरियाणाच्या दुसऱ्या डावातही मुशीरने २ विकेट्स घेतल्या.