वर्षभरापूर्वी लग्न, तरीही प्रियकराशी लपून भेटणं, बोलणं सुरूच, सासरच्यांनी सुनेला अन् तिच्या बॉय

नांदेड: एका धक्कादायक घटनेने नांदेड हादरलं आहे. पित्याने आपल्या पोटच्या विवाहित मुलीची आणि तिच्या प्रियकराची हत्या करून मृतदेह चाळीस फूट खोल आणि वीस ते तीस फूट पाणी असलेल्या विहरीत फेकले. धक्कादायक म्हणजे हत्या करून आरोपी पिता स्वतःहून पोलीस ठाण्यात हजर होऊन घटनेची माहिती दिली. जिल्ह्यातील उमरी तालुक्यातील गोळेगाव येथे ही धक्कादायक घटना  घडली आहे. पोलिसांनी गावकऱ्यांच्या मदतीने मुलीचा मृतदेह विहरीतून बाहेर काढले, तर मुलाचा शोध सुरुच होता.  संजीवणी कमळे (वय 19 वर्ष) आणि  लखन बालाजी भंडारे (वय 19) अशी मयतांची नावे आहेत. दरम्यान या घटनेने खळबळ उडाली आहे.

लग्नानंतर ही दोघांमध्ये फोनवर बोलणं सुरुच

मयत संजीवनी सुरने ही उमरी तालुक्यातील बोरजुन्नी येथील रहिवासी आहे. एक वर्षापूर्वी गोळेगाव येथील सुधाकर कमळे या मुलासोबत संजीवनीचा विवाह झाला होता. कुटुंबियांनी मोठ्या थाटात दोघांचा विवाह केला होता. विवाहापूर्वी संजीवनीचं लखन भंडारे या तरुणासोबत प्रेम प्रकरण सुरु होतं. लग्नानंतर ही दोघांमध्ये फोनवर बोलणं सुरुच होतं. सोमवारी संजीवनीच्या सासरचे मंडळी बाहेर गेल्याने संजीवनी हिने आपल्या प्रियकराला घरी बोलवले. अचानक घरी परतलेल्या पती आणि सासरच्या मंडळींनी संजीवनी आणि तिच्या प्रियकराला नको त्या अवस्थेत बघितले. त्यानंतर संजीवनीच्या पतीने सासऱ्यांना फोन करून बोलावले आणि मुलीला घरी घेऊन जाण्यास सांगितले.

दोघांना मारहाण करून त्यांची हत्या केली

मुलीचे वडील मारोती सुरणे, काका माधव सुरणे आणि आजोबा लक्ष्मण सुरणे हे तिघे जण मुलीच्या सासरी गोळेगावला पोहचले. गोळेगाव आणि बोरजुन्नी हे आजू बाजूला गावं आहे. आरोपींनी मुलीला आणि तिच्या प्रियकराला घेऊन जातं असताना करकाळा शिवारात दोघांना मारहाण करून त्यांची हत्या केली, त्यानंतर चाळीस फूट खोल असलेल्या विहरीत दोघांचे मृतदेह फेकून दिले. घटनेनंतर सायंकाळी 5 वाजण्याच्या सुमारास मुलीचे वडिल मारोती सुरणे हे उमरी पोलीस ठाण्यात पोहचले आणि मी मुलीला आणि तिच्या प्रियकराला मारून विहरीत फेकलं आहे अशी माहिती दिली.

आजोबा, वडील,  काका तिघांना ताब्यात घेतले

माहिती ऐकताच पोलीस देखील चक्रावून गेले. दरम्यान पोलीस आरोपीला घेऊन घटनास्थळी पोहचले. सायंकाळी सात वाजता मुलीचे प्रेत बाहेर काढण्यात आले तर मुलगाच्या प्रेताचा शोध सुरूच आहे. दरम्यान सदर घटनेची माहिती मिळताच अप्पर पोलिस आधिक्षक अर्चना पाटील, उपविभागीय पोलिस आधिकारी दशरथ पाटील यांनी घटनास्थळी भेट दिली. यावेळी उमरी पो स्टे चे सहाय्यक पोलीस निरीक्षक अंकुश माने यांनी घटनास्थळीचा पंचनामा केला. या प्रकरणी उमरी पोलीस ठाण्यात मुलीचे आजोबा लक्ष्मण सुरणे, वडील मारोती सुरणे आणि काका माधव सुरणे या तिघांना ताब्यात घेतले. या घटनेने खळबळ उडाली आहे.

आणखी वाचा