Iran Israel War – इराणने होर्मुझची सामुद्रधुनी खुली न केल्यास वीज प्रकल्प उद्ध्वस्त करू; नेतान्याहू यांचा ट्रम्प यांच्या अल्टिमेटमला पाठिंबा

इराणसोबत सुरू असलेल्या वाढत्या संघर्षाच्या पार्श्वभूमीवर इस्रायलचे पंतप्रधान बेंजामिन नेतान्याहू यांनी अमेरिकेच्या आक्रमक भूमिकेला आपला पूर्ण पाठिंबा दर्शवला आहे. इराणने जर मोक्याची मानली जाणारी ‘होर्मुझची सामुद्रधुनी’ वाहतुकीसाठी खुली केली नाही, तर इराणच्या वीज वितरण प्रणालीवर अमेरिका करणार असलेल्या संभाव्य हल्ल्यांचे इस्रायल समर्थन करेल, असे नेतान्याहू यांनी स्पष्ट केले आहे. दक्षिण इस्रायलमधील अराद शहरात इराणी क्षेपणास्त्र हल्ल्यामुळे झालेल्या नुकसानीची पाहणी करताना त्यांनी हे महत्त्वपूर्ण विधान केले.

यावेळी पत्रकारांशी संवाद साधताना पंतप्रधान नेतान्याहू यांनी अमेरिकेचे राष्ट्राध्यक्ष डोनाल्ड ट्रम्प यांच्या भूमिकेचे स्वागत केले. ट्रम्प यांनी इराणला पुढील 48 तासांच्या आत होर्मुझची सामुद्रधुनी पूर्णपणे खुली करण्याचा अल्टिमेटम दिला असून, तसे न झाल्यास इराणमधील सर्वात मोठ्या वीज प्रकल्पापासून सुरुवात करून देशातील विविध ऊर्जा केंद्रे नष्ट करण्याचा इशारा दिला आहे. नेतान्याहू यांनी याला दुजोरा देताना सांगितले की, इस्रायल आणि अमेरिका या युद्धात पूर्णपणे एकत्र असून आगामी सर्व कारवाया अत्यंत गुप्तपणे केल्या जातील. इराणचा अणुप्रकल्प आणि क्षेपणास्त्र कार्यक्रम पूर्णपणे नष्ट करणे हेच उभय देशांचे अंतिम उद्दिष्ट असल्याचेही त्यांनी यावेळी नमूद केले.

होर्मुझची सामुद्रधुनी हा जागतिक तेल व्यापारासाठी अत्यंत महत्त्वाचा मार्ग असून जगातील सुमारे 20 टक्के तेल निर्यात याच मार्गावरून होते. युद्ध सुरू झाल्यापासून इराणने हा मार्ग रोखून धरल्याने जागतिक स्तरावर तणाव निर्माण झाला आहे. दुसरीकडे, इराणनेही प्रतिहल्ला करण्याची धमकी दिली असून, त्यांच्या वीज प्रकल्पांना लक्ष्य केल्यास ते इस्रायली आणि अमेरिकन तळांना पुरवठा करणाऱ्या प्रादेशिक ऊर्जा आणि जल पायाभूत सुविधांवर हल्ले करतील, असे म्हटले आहे. इराणची ही राजवट केवळ इस्रायलसाठीच नव्हे, तर संपूर्ण जगाच्या शांततेसाठी घातक असल्याचे सांगत नेतान्याहू यांनी जागतिक नेत्यांना या युद्ध प्रयत्नांत सहभागी होण्याचे आवाहन केले आहे.