शनिवार (२८ मार्च) रोजी आयपीएल २०२६ च्या पहिल्या सामन्यात रॉयल चॅलेंजर्स बेंगळुरू आणि सनरायझर्स हैदराबाद हे संघ आमनेसामने आहेत. या सामन्यात बेंगळुरूने नाणेफेक जिंकून प्रथम गोलंदाजी करण्याचा निर्णय घेतला. दरम्यान, चाहत्यांचे लक्ष आरसीबीच्या ‘प्लेइंग ११’ कडे गेले, ज्यामध्ये अभिनंदन सिंग नावाचा खेळाडू दिसला. या नावाने सर्वांचे लक्ष वेधून घेतले आहे.
या सामन्याद्वारे अभिनंदन इंडियन प्रीमियर लीगमध्ये पदार्पण करत आहे. विशेष म्हणजे अभिनंदनने आतापर्यंत एकही रणजी सामना खेळलेला नाही, तरीही त्याला थेट रॉयल चॅलेंजर्स बेंगळुरूच्या प्लेइंग ११ मध्ये स्थान मिळाले. सीझन सुरू होण्यापूर्वी सराव सामन्यात विराट कोहलीला दोनदा बाद केल्यामुळे अभिनंदनने बरीच प्रसिद्धी मिळवली होती. याच कामगिरीमुळे तो चर्चेत आला होता. चला तर मग जाणून घेऊया कोण आहे हा अभिनंदन सिंह.
आरसीबीने अभिनंदनला २०२६ च्या सीझनसाठी रिटेन केले होते. २०२५ च्या सीझनसाठी झालेल्या मेगा ऑक्शनमध्ये फ्रँचायझीने अभिनंदनला ३० लाख रुपयांना खरेदी केले होते. मात्र, गेल्या सीझनमध्ये त्याला एकही सामना खेळण्याची संधी मिळाली नव्हती.
अभिनंदन हा उत्तर प्रदेशचा वेगवान गोलंदाज असून त्याचे वय २८ वर्षे आहे. ३० मार्चला म्हणजेच दोन दिवसांनंतर तो २९ वर्षांचा होईल.
विशेष बाब म्हणजे अभिनंदनने अद्याप कोणत्याही प्रकारचे देशांतर्गत क्रिकेट (Domestic Cricket) खेळलेले नाही, ज्यामध्ये रणजी, लिस्ट-ए आणि टी२० क्रिकेट (सय्यद मुश्ताक अली ट्रॉफी) यांचा समावेश आहे.
२०२४ च्या ‘यूपी टी२० लीग’मधील शानदार कामगिरीनंतर अभिनंदनचे नशीब चमकले. त्या स्पर्धेत लखनऊ फाल्कन्सकडून खेळताना त्याने १० डावात १५ बळी घेतले होते. त्याच्या या कामगिरीची दखल घेत आरसीबीने त्याला मेगा ऑक्शनमध्ये खरेदी केले. आता २८ मार्च २०२६ रोजी अभिनंदनला अखेर आयपीएलमध्ये पदार्पण करण्याची संधी मिळाली आहे.
Comments are closed.