पाकिस्तानमध्ये नवा ड्रामा! मोहम्मद रिजवानने पिसीबीच्या मागण्या नाकारल्या, 'या' कारणामुळे घेतला मोठा निर्णय

पाकिस्तानचा विकेटकीपर-फलंदाज मोहम्मद रिजवान याने सेंट्रल कॉन्ट्रॅक्टवर स्वाक्षरी करण्यास नकार दिला आहे. मीडिया रिपोर्ट्सनुसार, 30 खेळाडूंमध्ये तो एकमेव खेळाडू आहेत ज्याने अद्याप करारावर स्वाक्षरी केलेली नाही. असे सांगितले जात आहे की काही वैयक्तिक मागण्या पूर्ण न झाल्यामुळे रिजवानने हा निर्णय घेतला आहे.

पाकिस्तानी मीडिया एजन्सी ‘A स्पोर्ट्स’ च्या माहितीनुसार, पीसीबी रिजवानच्या मागण्यांवर पुन्हा विचार करेल, अशी शक्यता अत्यंत कमी आहे. पाकिस्तान क्रिकेट बोर्डने जाहीर केलेल्या नव्या सेंट्रल कॉन्ट्रॅक्ट यादीत रिजवान यांना ‘कॅटेगरी बी’ मध्ये ठेवण्यात आले आहे. या श्रेणीत एकूण 10 खेळाडू आहेत, ज्यात बाबर आझम याचे नावही समाविष्ट आहे. विशेष म्हणजे, या वेळेस कोणत्याही खेळाडूला ‘कॅटेगरी ए’ मध्ये स्थान देण्यात आलेले नाही.

ही बातमी अशा वेळी समोर आली आहे, जेव्हा काही दिवसांपूर्वीच रिजवान याला वनडे संघाच्या कर्णधारपदावरून हटवण्यात आले होते. शाहीन शाह आफ्रिदी आता पाकिस्तानच्या नव्या वनडे कर्णधारपदी विराजमान झाले आहेत. लक्षात ठेवा, ऑक्टोबर 2024 मध्ये रिजवान यांनी बाबर आझमची जागा घेत पाकिस्तानच्या वनडे संघाचे नेतृत्व स्वीकारले होते. त्याचा कर्णधारपदाचा प्रवास जवळपास एका वर्षाचा होता.

त्यांच्या कर्णधारपदाच्या सुरुवातीला पाकिस्तानने चांगली कामगिरी केली होती, कारण रिजवानच्या नेतृत्वाखाली पाक संघाने ऑस्ट्रेलिया आणि दक्षिण आफ्रिकेला त्यांच्या घरच्या मैदानावर पराभूत केले होते. मात्र, टी20 फॉरमॅटमध्ये रिजवानच्या कर्णधारपदाखाली पाकिस्तान सर्व चार सामने हरला, त्यामुळे त्याचा टी20 कर्णधारपदाचा प्रवास फार काळ टिकू शकला नाही.

मोहम्मद रिजवानच्या कर्णधारपदावर पुन्हा प्रश्नचिन्ह तेव्हा उभे राहिले, जेव्हा पाकिस्तान चॅम्पियन्स ट्रॉफी 2025चे यजमान असूनही नॉकआउट फेरीसाठी पात्र ठरू शकला नाही. त्यानंतर न्यूझीलंडने पाकिस्तानचा 3-0 असा धुव्वा उडवला आणि मग वेस्ट इंडिजकडून 1-2 असा पराभव पत्करावा लागला.