आयुषमन योजनेसाठी नवीन शिफारसी

वयोमर्यादा कमी करण्यासह मदत 10 लाख रुपयांपर्यंत वाढवण्याचा प्रस्ताव

वृत्तसंस्था/ नवी दिल्ली

आयुष्मान योजनेअंतर्गत मोफत उपचारांसाठी वयोमर्यादा 60 वर्षे असावी. यासोबतच, उपचारांसाठी देण्यात येणारी 5 लाख रुपयांची रक्कमही दुप्पट करून 10 लाख रुपये करावी, अशी शिफारस करण्यात आल्याचे समजते. सध्या 70 वर्षांपेक्षा जास्त वयाच्या लोकांनाच याचा लाभ मिळत आहे. राज्यसभा खासदार राम गोपाल यादव यांच्या अध्यक्षतेखालील आरोग्य आणि कुटुंब कल्याण समितीने केंद्र सरकारला याची शिफारस केली आहे. देशभरातील जास्तीत जास्त लोकांना या आरोग्य योजनेचा लाभ घेता येईल.

केंद्र सरकारने गेल्यावर्षी 11 सप्टेंबर रोजी प्रधानमंत्री जन आरोग्य योजनेचा विस्तार करून 4.5 कोटी कुटुंबांमधील 70 वर्षे आणि त्याहून अधिक वयाच्या 6 कोटी ज्येष्ठ नागरिकांना या योजनेत समाविष्ट केले होते. आयुष्मान भारत ही जगातील सर्वात मोठी आरोग्य विमा योजना आहे. या योजनेत समाविष्ट देशातील 40 टक्के लोकांना दरवर्षी 5 लाख रुपयांपर्यंत मोफत उपचार दिले जातात.

राष्ट्रीय आरोग्य धोरणांतर्गत केंद्र सरकारने 2017 मध्ये ही योजना सुरू केली. तथापि, पश्चिम बंगालसह अनेक राज्ये ही योजना स्वीकारण्यास नकार देत आहेत. मात्र, काही राज्यांमध्ये स्वत:ची आरोग्य योजना चालवली जात आहे. या योजनेअंतर्गत, देशभरातील निवडक सरकारी आणि खासगी रुग्णालयांमध्ये उपचार घेता येतात. या योजनेअंतर्गत रुग्णालयात दाखल होण्यापूर्वी आणि नंतर 10 दिवसांनी झालेला खर्च देण्याची तरतूद आहे.

सर्व आजारांचा समावेश

आयुष्मान योजनेअंतर्गत जुनाट आजारदेखील समाविष्ट आहेत. कोणत्याही आजारासाठी रुग्णालयात दाखल होण्यापूर्वी आणि नंतरचा खर्च या योजनेअंतर्गत समाविष्ट केला जातो. सर्व वैद्यकीय चाचण्या, ऑपरेशन्स, उपचार इत्यादींचा त्यात समावेश आहे. आतापर्यंत, या योजनेअंतर्गत 5.5 कोटींहून अधिक लोकांनी स्वत:वर उपचार केले आहेत.