पॅट कमिन्सच्या नेतृत्वाखालील ऑस्ट्रेलियन संघाने तिसऱ्या अॅशेस कसोटीत इंग्लंडचा 82 धावांनी पराभव केला आणि पाच सामन्यांच्या मालिकेत 3-0 अशी निर्णायक आघाडी घेतली. या विजयासह ऑस्ट्रेलियाने वर्ल्ड टेस्ट चॅम्पियनशिप (WTC) पॉइंट टेबलमध्ये आपले वर्चस्व कायम ठेवले आहे. ऑस्ट्रेलियाने सध्याच्या WTC मध्ये सहा सामने खेळले आहेत आणि ते सर्व जिंकल्यानंतर, 100 टक्के गुणांसह ते पहिल्या स्थानावर आहेत. दरम्यान, पराभवाची हॅट्ट्रिक झेलणारा इंग्लंड भारतापेक्षाही वाईट स्थितीत आहे. इंग्लंडचा विजयाचा टक्का आता 30 पेक्षा कमी झाला आहे.
AUS vs ENG तिसऱ्या कसोटीनंतर WTC पॉइंट टेबलच्या ताज्या अपडेटवर नजर टाकल्यास, गतविजेता दक्षिण आफ्रिका ऑस्ट्रेलियानंतर दुसऱ्या क्रमांकावर आहे. भारतात 2-0 अशी मालिका जिंकल्यानंतर, दक्षिण आफ्रिकेचे 75 टक्के गुण आहेत. ऑस्ट्रेलिया आणि दक्षिण आफ्रिकेसह पहिल्या पाचमध्ये न्यूझीलंड, श्रीलंका आणि पाकिस्तानचा समावेश आहे.
शुबमन गिलच्या नेतृत्वाखालील टीम इंडिया टॉप फाईव्हमधून बाहेर पडली आहे. दक्षिण आफ्रिकेकडून व्हाईटवॉश झाल्यानंतर टीम इंडियाची स्थिती वाईट आहे.
WTC पॉइंट टेबलमध्ये इंग्लंडची परिस्थिती भारतापेक्षाही वाईट आहे. इंग्लंडने आतापर्यंत खेळलेल्या आठ कसोटी सामन्यांपैकी फक्त दोन जिंकल्या आहेत, तर पाच गमावल्या आहेत. भारताविरुद्धची पाच सामन्यांची कसोटी मालिका 2-2 अशी बरोबरीत सोडल्यानंतर, ऑस्ट्रेलियाविरुद्धच्या अॅशेस मालिकेत ते 0-3 ने पिछाडीवर आहेत.
नाणेफेक जिंकून प्रथम फलंदाजी करण्याचा निर्णय घेत ऑस्ट्रेलियाने अॅलेक्स कॅरीच्या शतकाच्या जोरावर 371 धावा केल्या. प्रत्युत्तरात इंग्लंडचा संघ 286 धावांवर गडगडला आणि यजमान संघाला 85 धावांची आघाडी मिळाली. दुसऱ्या डावात कॅरी आणि ट्रॅव्हिस हेडने इंग्लंडला सावरले आणि त्यांच्या कारकिर्दीतील 11वे शतक झळकावले. ऑस्ट्रेलियाने हेडने शतक झळकावल्यानंतर फक्त एकदाच पराभव पत्करला आहे. दुसऱ्या डावात ऑस्ट्रेलियाने 349 धावा केल्या आणि 435 धावांचे लक्ष्य ठेवले. या धावसंख्येचा पाठलाग करताना इंग्लंडचा संघ 352 धावांवरच बाद झाला.
Comments are closed.