महापालिकेचा कचरा संकलन कामाचा अनुभव ठरला फायद्याचा, नागपूरात थेट काँग्रेसची उमेदवारी

नागपूर महानगरपालिका निवडणूक 2026: राज्यात महानगरपालिकांच्या निवडणुकांची रणधुमाळी प्रारंभ आहे. त्याf आणि पार्श्वभूमीवर नागपुरात (Nagpur Election 2026) देखील राजकारण तापलं आहे. अशातच नागपुरात यंदा प्रभाग 12 मधून काँग्रेस (Congress) पक्षाने अनुसूचित जमातीसाठीच्या जागेवरून ओमप्रकाश वाढवे (Omprakash Wadhwe) या अवघ्या 26 वर्षांच्या तरुणाला उमेदवारी दिली आहे. विशेष म्हणजे ओमप्रकाश काही दिवसांपूर्वीपर्यंत महापालिकेच्या कचरा व्यवस्थापन कामात कचरा संकलनाचे सुपरवायझर म्हणून काम करत होते. त्यानिमित्ताने त्यांचा प्रभागामधील विविध वस्त्यांमध्ये जोरदार जनसंपर्क होता. ओमप्रकाशचे तेच वैशिष्ट्य हेरून काँग्रेसने त्यांना प्रभाग 12 मधून माजी महापौर व वरिष्ठ भाजप नेत्या मायाताई इवनाते (Mayatai Ivnate) यांच्या विरोधात आपले उमेदवार बनवले आहे. कचरा संकलनाच्या जोरावर निर्माण झालेल्या जनसंपर्काच्या आधारावरच माझा विजय होईल, असा विश्वास ओमप्रकाश यांनी एबीपी माझाशी बातचीत करताना व्यक्त केला.

Nagpur BJP : बंडखोर उमेदवाराचे भाजपच्या अधिकृत उमेदवाराला खडे बोल

दुसरीकडे अशाच एका प्रभागातील उमेदवारी चर्चेत आली आहे. नागपुरात भाजपच्या काही इच्छुकांना पक्षाने उमेदवारी दिली आहे. तर अनेकांचा उमेदवारी न मिळाल्यामुळे हिरमोड झाला आहे. आणि त्यापैकी काहीजण बंडखोर म्हणून पक्षाच्या अधिकृत उमेदवारांच्या विरोधात निवडणुकीत उभे आहेत. नागपुरात प्रभाग 35 चे भाजपचे अधिकृत उमेदवार संदीप गवई जेव्हा मनीष नगर परिसरात बंडखोर उमेदवार आसावरी कोठीवान यांच्या परिसरात प्रचाराला गेले, तेव्हा अधिकृत उमेदवार संदीप गवई यांनी बंडखोर उमेदवार आसावरी कोठीवान यांच्या घरी जाऊन भेट घेण्याचे धाडस केले. तेव्हा बंडखोर उमेदवार आसावरी कोठीवान यांनी भाजपच्या अधिकृत उमेदवाराला चांगलेच खडे बोल सुनावत बोलतीच बंद केली. त्यांच्यातील हा नेमका संवाद काय तर जाणून घेऊ.

संदीप गवई (अधिकृत उमेदवार) – तू पक्षात येऊन जा..पक्षाला समर्थन कर.. सर्व काही तुझ्या मनासारख करू..

आसावरी कोठीवान (बंडखोर उमेदवार) – मी पक्षाकडे आशीर्वाद मागितले, मात्र तुम्ही ते नाकारले, म्हणून मी अपक्ष उभी झाले, मी उमेदवारी परत घेण्यासाठी उभे झालेले नाही..

संदीप गवई – तू सर्व नेत्यांना भेटली असती, तर नक्कीच तोडगा निघाला असता..

आसावरी कोठीवान – तोडगा काढण्यासाठी मी पक्षासाठी 25 वर्ष खर्च केले नाही. आता मला कुठलंही प्रलोभन देऊ नका. उमेदवारी मागे घेण्यासाठी बोलू नका..

संदीप गवई – तुम्ही मोठ्या बहिण आहात.. तुमच्याकडे फक्त आशीर्वादच मागू शकतो..

आसावरी कोठीवान – मी आशीर्वाद देते.. मात्र एक मत मला दे.. सर्वांना लाडकी बहीण बनवले, मला का परके केले?

संदीप गवई – तू आमच्यासाठी नेहमीच लाडकी बहीण आहे आणि राहणार…

आसावरी कोठीवान – जेव्हा मी पक्षाकडे उमेदवारी मागितली, तेव्हा पक्षाने माझ्याकडे दुर्लक्ष केले. आता वेळ निघून गेली आहे. आता मी लोकांच्या इच्छेनुसार अपक्ष उभी झाली आहे. त्यामुळे लोकांच्या प्रेमाकडे दुर्लक्ष करून उमेदवारी परत घेऊ शकत नाही.

संदीप गवई – आम्हाला अजूनही अपेक्षा आहे की मतदानाच्या पूर्वी तुम्ही आमच्या सोबत याल..

इतर महत्वाच्या बातम्या

आणखी वाचा