'तोयबाच्या' मालमत्तेवर एनआयएची कारवाई

दहशतवादी संघटनेशी संबंधित संपत्ती केली जप्त : लश्कर-ए-तोयबाच्या दहशतवाद्यांना दिला आश्रय

वृत्तसंस्था/ श्रीनगर

जम्मू काश्मीरमधील सुरक्षा सुनिश्चित करण्यासाठी तपास यंत्रणा सक्रियपणे काम करत आहेत. संवेदनशील भागांमध्ये शोधमोहिमांच्या माध्यमातून दहशतवादी कारवाया रोखण्याचे आणि त्यांच्या योजना हाणून पाडण्याचे प्रयत्न सुरू आहेत. याचदरम्यान, राष्ट्रीय तपास संस्थेने (एनआयए) जम्मू काश्मीरमध्ये मोठी कारवाई केली आहे. दहशतवादी कटाशी संबंधित एका प्रकरणात एनआयएने गुलाम मोहम्मद मीर उर्फ मामा गॅस याची मालमत्ता जप्त केली आहे. गुलाम हा लश्कर-ए-तोयबा या दहशतवादी संघटनेशी संबंधित होता. हे प्रकरण 31 मार्च रोजी जम्मू काश्मीर पोलिसांच्या निदर्शनास आल्यानंतर एनआयएने तपास सुरू केला होता. जवळपास सहा महिन्यांच्या तपासानंतर एनआयएने कारवाई करत गुलामची मालमत्ता जप्त केली.

एनआयएने गुलाम मोहम्मद मीर याच्या मालमत्तेवर कारवाई केली आहे. गुलाम हा लश्कर-ए-तोयबा या दहशतवादी संघटनेशी संबंधित होता. 6 एप्रिल 2026 रोजी श्रीनगरच्या हजरतबल भागातील दनिहामा येथे गुलाम मोहम्मद मीर यांच्या घरी केलेल्या झडतीदरम्यान, अबू हुरैरा आणि खुबैब नावाचे दोन संशयित पाकिस्तानी दहशतवादी आढळले होते. त्यांचा संबंध लश्कर-ए-तोयबाशी असल्याचा आरोप होता. घटनास्थळावरून स्फोटकांसारखे साहित्य, डिजिटल उपकरणे आणि इतर गुन्हेगारी स्वरूपाचे साहित्यही जप्त करण्यात आले होते. आरोपीने जाणीवपूर्वक आपली निवासी मालमत्ता दहशतवाद्यांसाठी सुरक्षित आश्रयस्थान म्हणून उपलब्ध करून दिली होती आणि त्यांच्या कारवायांना पाठिंबा देण्यासाठी आपल्या मालमत्तेचा वापर होऊ दिला होता, असेही तपासात उघड झाल्याचे सांगण्यात आले.