MLC: निकोलस पूरनचे सर्वात जलद शतक अन् पोलार्डचा 1000 वा सिक्स; अमेरिकेत आले कॅरिबियन वादळ, मात्र…

अमेरिकेत सुरू असलेली टी 20 लीग स्पर्धा म्हणजे मेजर लीग क्रिकेट (एमएलसी) टी 20 स्पर्धा 2026 चा हंगाम सुरू आहे. यामध्ये गुरूवारी (16 जुलै) कॅरिबियन फलंदाजांनी धुमाकूळ घातला आहे. वेस्ट इंडिजच्या दिग्गजांनी नॉकआऊट सामन्यांमध्ये आपले कौशल्य दाखवले आहे. या लीगमधील सर्वात जलद शतक निकोलस पूरनने झळकावले, तर कायरन पोलार्डने टी 20 क्रिकेटमधील आपला 1000 वा षटकार मारून इतिहास रचला.

एमएलसीमध्ये सध्या एलिमिनेटरचे सामने सुरू आहेत. यामध्ये गुरूवारी वॉशिंग्टन फ्रीडम आणि एमआय न्यूयॉर्क ओकलंडमध्ये भिडले. वॉशिंग्टनचा कर्णधार स्टीव्ह स्मिथने नाणेफेक जिंकत न्यूयॉर्कला प्रथम फलंदाजी करण्याचे आव्हान दिले. त्याचा हा निर्णय वेस्ट इंडिजच्या स्फोटक फलंदाजांनी पूर्णपणे चुकीचा ठरवला.

पूरनचे 31 चेंडूंत शतक
पूरनने अवघ्या 31 चेंडूंत शतक पूर्ण केले, जे या लीगमधील आतापर्यंतचे सर्वात जलद शतक ठरले आहे. त्याने 13 षटकार आणि 5 चौकार मारले. तो 33 चेंडूंमध्ये 106 धावा करत बाद झाला. त्याआधी न्यूयॉर्कला दुसऱ्या षटकातच पहिला धक्का बसला होता. त्यानंतर पूरनने क्विंटन डी कॉकसोबत धमाकेदार फलंदाजी करत संघाचा धावफलक हलता ठेवला. दोघांनी दुसऱ्या विकेटसाठी 42 चेंडूंत 118 धावांची भागीदारी केली.