आता मोबाईलवर IPL मोफत नाही! किती असेल रिचार्ज आणि फ्रीमध्ये पाहण्यासाठी काय आहे मार्ग? वाचा सविस्तर

आयपीएल 2026 स्पर्धेचा (Indian premiere league 2026) पहिला सामना आता अवघ्या काही तासांनंतर सुरू होईल. दरम्यान, जर तुम्हाला हा सामना मोबाईलवर पाहायचा असेल, तर त्यासाठी आता तुम्हाला थोडे पैसे खर्च करावे लागतील. कारण तुम्ही आता हे सामने मोफत पाहू शकणार नाही. महत्वाची गोष्ट म्हणजे, मॅच पाहण्याचे अनेक मार्ग आहेत, जे तुम्हाला सोयीचे वाटतील त्याप्रमाणे तुम्ही सामन्याचा आनंद घेऊ शकता.

काही वर्षांपूर्वीपर्यंत आयपीएलचे सामने ‘जियो सिनेमा’ (Jio Cinema) या मोबाईल ॲपवर येत आहेत. 2023 आणि 2024 मध्ये परिस्थिती अशी होती की, तुम्ही सामने मोफत पाहू शकत होतात, म्हणजेच त्यासाठी तुम्हाला कोणताही पैसा खर्च करावा लागत नव्हता. फक्त मोबाईलमध्ये जियो सिनेमा ॲप डाऊनलोड करायचे आणि आरामात फ्रीमध्ये मॅच पाहायची. पण गेल्या वर्षीच्या आयपीएलपूर्वी जियोचे ‘डिस्ने हॉटस्टार’मध्ये विलीनीकरण झाले आहे. त्यानंतर ‘जियो हॉटस्टार’ (Jio Hotstar) हे नवीन ॲप आले. त्यानंतर सामने तिथे दिसू लागले आणि मोफतचा काळ संपला.

आता या वर्षाबद्दल बोलायचे झाले तर, जर तुम्हाला आयपीएल 2026 चे सामने तुमच्या मोबाईलवर ‘जियो हॉटस्टार’वर पाहायचे असतील, तर जियो हॉटस्टारने आपल्या सबस्क्रिप्शन प्लॅनमध्ये तुम्हाला अनेक पर्याय दिले आहेत, त्यापैकी तुम्ही कोणताही निवडू शकता. पहिला आहे ‘मोबाईल प्लॅन’. यासाठी तुम्ही तीन महिन्यांसाठी 149 रुपये खर्च करू शकता. म्हणजेच या प्लॅनमध्ये तुमचे संपूर्ण आयपीएल आरामात निघून जाईल. जर तुम्हाला संपूर्ण वर्षासाठी हा प्लॅन घ्यायचा असेल, तर 499 रुपये खर्च करावे लागतील. यात एक गोष्ट म्हणजे, एका वेळी फक्त एकाच मोबाईलवर तुम्ही मॅच पाहू शकाल.

यानंतर येतो दुसरा प्लॅन, ज्याला कंपनीने ‘सुपर प्लॅन’ असे नाव दिले आहे. जर तुम्ही तीन महिन्यांसाठी हा प्लॅन घेतला तर 299 रुपये खर्च करावे लागतील, तर एका वर्षासाठी 899 रुपये तुमच्या खिशातून जातील. याची खास गोष्ट अशी आहे की, तुम्ही मोबाईल, टीव्ही आणि लॅपटॉप यांपैकी एकाच वेळी दोन ठिकाणी मॅच पाहू शकता, जे मागील प्लॅनमध्ये शक्य नव्हते. यानंतर येतो ‘प्रीमियम प्लॅन’. हा प्लॅन घेण्यासाठी तुम्हाला एका महिन्यासाठी 299 रुपये खर्च करावे लागतील. तसेच, जर हा प्लॅन एका वर्षासाठी घेतला तर 1499 रुपये लागतील. या प्लॅनचे वैशिष्ट्य म्हणजे एकाच वेळी चार डिव्हाइसेसवर तुम्ही मॅचचा आनंद घेऊ शकता. सोबतच तुम्हाला ‘4K’ मध्ये मॅच पाहण्याचा अनुभव मिळेल.

तसेच, जर तुमच्याकडे जियोचे सिम कार्ड असेल आणि तुम्ही 349 रुपये किंवा त्यापेक्षा जास्त रुपयांचा रिचार्ज केला असेल, तर तुम्हाला सबस्क्रिप्शन मोफत मिळते, म्हणजेच वेगळी मेंबरशिप घेण्याची गरज नाही. हे तर झाले जियो हॉटस्टारबद्दल, पण जर तुम्ही टीव्हीवर मॅच पाहत असाल, तर तिथे तुम्ही थेट ‘स्टार स्पोर्ट्स’ चॅनेलवर लाईव्ह सामन्याचा आनंद घेऊ शकता. यासाठी तुम्हाला वेगळा चार्ज द्यावा लागणार नाही, पण केबल ऑपरेटरचा जो काही दर असेल तो द्यावा लागेल. थोडक्यात सांगायचे तर, मोबाईलवर मॅच पाहायची असेल तर ती मोफत मिळणार नाही, पण खर्च कमी करण्यासाठी तुम्ही वेगवेगळे मार्ग अवलंबून नक्कीच मॅच पाहू शकता.