मराठवाडा मुक्तिसंग्राम कार्यक्रमात मुख्यमंत्र्यांसमोर ओबीसी कार्यकर्त्यांची प्रचंड घोषणाबाजी, उडाला एकच गोंधळ

मराठवाडा मुक्तिसांग्रॅम कार्यक्रमामध्ये मुख्यमंत्री देवेंद्र फडणवीस यांना ओबीसी कार्यकर्त्यांच्या रोषाचा सामना करावा लागला. ओबीसी कार्यकर्त्यांनी कार्यक्रमस्थळी जोरदार घोषणाबाजी केल्याने एकच गोंधळ उडाला. अचानक झालेल्या या घोषणाबाजीमुळे पोलिसांची चांगलीच धावपळ उडाली. पोलिसांनी काही कार्यकर्त्यांना ताब्यात घेतल्याचेही वृत्त आहे.

मराठवाडा मुक्तिसंग्राम कार्यक्रमानिमित्त मुख्यमंत्री देवेंद्र फडणवीस हे ध्वजारोहण आणि हुतात्म्यांना अभिवादन करण्यासाठी छत्रपती संभाजीनगर येथे दाखल झाले होते. या कार्यक्रमामध्ये गोंधळाची शक्यता असल्याने मंगळवार रात्रीपासूीन पोलिसांनी चोख बंदोबस्त ठेवला होता. मात्र पोलिसांचा कडक बंदोबस्त भेदून ओबीसी संघटनांचे कार्यकर्ते कार्यक्रमस्थळी पोहोचले आणि मुख्यमंत्री देवेंद्र फडणवीस यांच्या भाषणावेळी प्रचंड घोषणाबाजी केली. ऐनवेळी घडलेल्या या प्रकारामुळे कार्यक्रमस्थळी मोठा गोंधळ उडाला. अखेर पोलिसांनी ओबीसी कार्यकर्त्यांची धरपकड केली आणि त्यांना ताब्यात घेतले आहे.