देवाचं नामस्मरण करताना मृत्यूने गाठलं, हसत-खेळत भजनं गात होत्या अन्… पुणे पिकअप अपघातापूर्वीच

चाकण : श्रावणी सोमवारनिमित्त खेड तालुक्यातील कुंडेश्वर शिव मंदिरात दर्शनासाठी जाणाऱ्या भाविकांच्या वाहनाला भीषण अपघात झाला. भाविकांना घेऊन घाटातून जाणारी पीकअप खोल दरीत कोसळली, या भीषण अपघाताने संपूर्ण परिसर हादरला आहे. या दुर्दैवी घटनेत 10 महिलांचा मृत्यू झाला असून, अनेक जण जखमी झाले आहेत. या अपघाताने कुंडेश्वर डोंगराच्या रस्त्याच्या सुरक्षिततेवर आणि प्रशासनाच्या निष्काळजीपणावर गंभीर प्रश्न उपस्थित केले जात आहेत, श्रावण महिन्याच्या निमित्ताने पाइंटजवळील पापळवाडी येथून 35 महिला आणि दोन लहान मुले अशी एकूण 37 जण पिकअप वाहनातून कुंडेश्वर येथील महादेव मंदिरात दर्शनासाठी जात होती. मात्र, घाटाच्या पहिल्याच वळणावर वाहन चालकाचे beuveb नियंत्रण सुटले आणि वाहन मागे सरकत पाच ते सहा पलट्चा खात खोल दरीत कोसळले. या अपघाताच्या काही मिनीटे आधी या महिला उत्साहात विठ्ठलाची गाणी म्हणत असल्याचा आणि भक्तीमय वातावरणात दर्शनासाठी जात असल्याचं दिसून येत आहे.

महिलांचा शेवटचा व्हिडीओ समोर

या दुर्दैवी अपघाताच्या काही मिनिटे आधीच पिकअपमध्ये महिला हसत, बोलत आणि गाणी म्हणत कुंडेश्वराच्या दर्शनासाठी निघाल्या असल्याचं दिसून येतं, भक्तीभावाने सुरु झालेला हा आनंदमय प्रवास काही क्षणात शोकांतिकेत बदलला गेला. त्या महिलांसाठी तोच शेवटचा क्षण ठरला. विठ्ठलाचे नामस्मरण करत निघालेल्या महिलांवर काळाने घाला घातला, या घटनेनंतर सर्वत्र हळहळ व्यक्त होत आहे.

खेड तालुक्यातील शिव कुंडेश्वर मंदिरात दर्शनासाठी जाताना पिकअपचा अपघात झाला, त्या अपघातापूर्वी शेवटचा व्हिडिओ समोर आला आहे, देवाचं नामस्मरण आणि भजनं म्हणत हसत-खेळत या महिला प्रवास करत होत्या.#प्यूनिन्यू #Accidednews #Video pic.twitter.com/ltkxov3u0a

– अंकीता शांतीनाथ खाने (@khaneankita) 12 ऑगस्ट, 2025

कुंडेश्वर अपघातातील चालकाला अटक

पुण्याच्या खेडमधील कुंडेश्वर अपघातात 10 महिलांच्या मृत्यूला कारणीभूत ठरलेल्या चालकाला अटक करण्यात आली आहे. हृषीकेश करंडे असं त्याचं नाव आहे. हृषीकेशवरती सदोष मनुष्य वधाचा गुन्हा दाखल करण्यात आला आहे. सोबतच जखमी 30 महिला आणि लहानग्यांच्या जीव धोक्यात आणला. तीव्र चढाई असल्याची कल्पना असताना दुसऱ्यांचा जीवास कारणीभूत ठरेल अशी अवैध वाहतूक, निष्काळजीपणे वाहतूक करणे, अशा वाहतुकीच्या नियमांचं उल्लंघन केल्याप्रकरणी ही गुन्हा दाखल करण्यात आला आहे. रात्रीचं त्याला म्हाळुंगे पोलिसांनी अटक केली आहे.

मृत महिलांची नावं

शोभा ज्ञानेश्वर पापळ (27), सुमन काळूराम पापळ(40), शारदा रामदास चोरगे (45), मंदा कानिफ दरेकर (55), संजीवनी कैलास दरेकर (55), मिराबाई संभाजी चोरगे (55), बायडाबाई ज्ञानेश्वर दरेकर (50), शकुंतला तानाजी चोरघे (50), पार्वताबाई दत्तू पापळ (60), फसाबाई प्रभू सावंत (62), सर्व रा. पापळवाडी, पाईट, ता, खेड. या दुर्दैवी अपघातस्थळावर जागोजागी फुटलेल्या बांगड्यांचा खच, चपलांचा ढीग दिसून येत होता. सोबत आलेल्या आपल्या जीवाभावाच्या महिलांचे मृतदेह पाहून महिलांना अश्रू अनावर झाले.

कुंडेश्वर डोंगरावर जाणारा घाट रस्ता अरुंद, कच्चा आणि धोकादायक वळणांनी भरलेला आहे. काही ठिकाणी तीव्र चढ-उतार असून, रस्त्याला संरक्षक कठडे किंवा भिंती बसवलेल्या नाहीत. दोन वाहने समोरासमोर आल्यास चालकांना मोठी कसरत या मार्गावरती करावी लागते. यासोबतच रस्त्याच्या सुरक्षिततेसाठी आवश्यक उपाययोजनांकडे पूर्णपणे दुर्लक्ष झाल्याचं स्थानिकांनी म्हटलं आहे. या अपघाताने प्रशासनाला जाग येण्याची गरज आहे. रस्त्याची दुरुस्ती, कठडे, भिंती आणि सुसज्ज पार्किंग व्यवस्था आणि वाहतूक नियंत्रणासाठी तातडीने पावले उचलणे आवश्यक आहे. कुंडेश्वर डोंगराच्या विकासासाठी वन विभाग आणि जिल्हा परिषदेने अनेक उपाययोजना केल्या असल्या, तरी सुरक्षिततेच्या दृष्टिकोनातून अधिक प्रयत्नांची गरज आहे. स्थानिक नागरिकांनी या घटनेनंतर प्रशासनाला जबाबदार  ठरवत कठोर कारवाईची मागणी केली आहे.

आणखी वाचा