कॅनडामध्ये ‘ग्रेटर टोरंटो’ भागात काम करणाऱ्या हिंदुस्थानी वंशाच्या एका ‘टेकी’ने शेअर ट्रेडिंगद्वारे 3 लाख 50 हजार कॅनेडियन डॉलर्स (सुमारे 2.39 कोटी रुपये) अधिक रक्कम कशी गमावली आहे. याबाबत 31वर्षीय अक्षय सप्रा याने सांगितले की, सुरुवातीला काही अतिरिक्त पैसे कमवण्याच्या उद्देशाने सुरू झालेला हा प्रवास लवकरच एका गंभीर ‘ट्रेडिंग व्यसना’त बदलला, ज्यामुळे तो मोठ्या कर्जाच्या विळख्यात सापडला. ‘बिझनेस इनसाइडर’शी बोलताना सप्राने सांगितले की, तो चार वर्षांचा असताना त्याचे कुटुंब हिंदुस्थानातून कॅनडाला स्थायिक झाले. सुरुवातीला त्यांनी छोटी-मोठी कामे केली आणि त्यानंतर त्याच्या वडिलांनी केलोना येथे पशुवैद्यकीय व्यवसायात यश मिळवले होते.
सप्राने 2017 मध्ये कॉलेजमध्ये असताना पहिल्यांदा शेअर बाजारात पाऊल टाकले. एका मित्राने त्याला सांगितले होते की मारिजुआना (गांजा) कायदेशीर होणार आहे. त्यानंतर सप्राने मारिजुआनाशी संबंधित कंपन्यांचे काही शेअर्स खरेदी केले आणि त्या शेअर्सच्या किमतीत वाढ झाली. सप्राने त्यातून फारसा मोठा नफा कमावला नाही, तरीही तो शेअर्सची खरेदी-विक्री करत राहिला आणि किमतीतील अल्पकालीन चढ-उतार ओळखण्याचा प्रयत्न करत राहिला. “त्या काळात प्रत्येक व्यवहारासाठी (ट्रेडसाठी) 10 डॉलर्सचा खर्च येत असूनही, मी व्यवहार करणे थांबवू शकत नव्हतो. विद्यापीठातील व्याख्यानांदरम्यान प्रश्न विचारण्यासाठी आणि अभ्यासात रस असल्याचे दाखवण्यासाठी मी अगदी पुढच्या रांगेत बसायचो; पण 10 मिनिटे उलटताच मी माझ्या लॅपटॉपवर ट्रेडिंग करायला सुरुवात करायचो.” असे सप्रा म्हणाले.
एनडीटीव्हीने दिलेल्या वृत्तानुसार पदवी पूर्ण केल्यानंतर सप्रा यांना अभियांत्रिकी क्षेत्रातील नोकरी मिळाली, पण कालांतराने ट्रेडिंग पुन्हा त्यांच्या आयुष्यात आले. ‘मेटा’ (Meta) कंपनीवर लावलेली एक साधीशी पैज त्यांच्या आयुष्याला कलाटणी देणारी ठरली. “एके दिवशी ‘मेटा’ (Meta) कंपनीचे आर्थिक निकाल जाहीर होणार होते आणि दुपारच्या जेवणाच्या वेळी मी पैज लावली की कंपनीचे शेअर्स पडतील. कंपनीची कामगिरी खराब झाली आणि माझ्या पैजेतून मला मोठा नफा झाला. तो आनंद साजरा करण्यासाठी मी एक महागडी ‘मार्टिनी’ (martini) विकत घेतली – अशी गोष्ट जी मी यापूर्वी कधीच केली नव्हती,” असे त्यांनी सांगितले. पुढील चार वर्षे सप्रा ट्रेडिंग करत राहिले; कधी नफा झाला तर कधी मोठे नुकसान सोसावे लागले.
सप्रा यांनी ‘स्पेसएक्स’ (SpaceX) वर मोठी पैज लावून नफा कमावण्याचा प्रयत्न केला, पण त्यात त्यांना यश आले नाही. अखेरीस त्यांचे 3 लाख 50 हजार कॅनेडियन डॉलर्सहून अधिकचे नुकसान झाले. इतके नुकसान होऊनही, सप्रा यांनी ट्रेडिंग सुरू ठेवण्याचा आणि एक यूट्यूब चॅनेल सुरू करण्याचा निर्णय घेतला आहे. या चॅनेलवर ते प्रत्येक व्यवहाराची नोंद करतील, जेणेकरून त्यांना स्वतःला जबाबदार धरता येईल.
Comments are closed.