आर अश्विनने 'या' खेळाडूला निवडले वर्षातील सर्वोत्तम भारतीय गोलंदाज, जाणून घ्या सविस्तर

भारतीय पुरुष क्रिकेट संघासाठी 2025 हे वर्ष अत्यंत शानदार राहिले. संघाने मर्यादित षटकांच्या क्रिकेटमध्ये चॅम्पियन्स ट्रॉफी आणि आशिया चषक यांसारख्या मोठ्या स्पर्धा जिंकल्या. या दोन्ही स्पर्धांमधील भारताच्या विजयात फिरकीपटू वरुण चक्रवर्तीचे मोलाचे योगदान राहिले. भारताचे माजी दिग्गज खेळाडू आर. अश्विन यांनी वरुण चक्रवर्तीला 2025 या वर्षातील सर्वोत्तम भारतीय गोलंदाज म्हणून घोषित केले आहे.

आर. अश्विन यांनी त्यांच्या यूट्यूब चॅनेलवर म्हटले की, “वरुण भारताचा सर्वात महत्त्वाचा खेळाडू आहे. तो प्रत्येक प्रसंगी ‘एक्स फॅक्टर’ (X-factor) सिद्ध झाला आहे. फलंदाजांसाठी त्याला वाचणे (खेळणे) नेहमीच कठीण राहिले आहे. मी त्याला या वर्षातील संघाचा सर्वोत्कृष्ट गोलंदाज मानतो. 2026 च्या टी20 विश्वचषकात त्याची भूमिका अत्यंत महत्त्वाची ठरणार आहे.”

अश्विन पुढे म्हणाले की, “वरुणचा पहिला व्यवसाय क्रिकेट नव्हता. तो एक आर्किटेक्ट (वास्तुविशारद) होता. एका वेळी तो क्रिकेटमधून जवळपास बाहेर पडला होता, पण त्याने केलेले पुनरागमन थक्क करणारे आहे. चेन्नईतील स्थानिक क्रिकेट, त्यानंतर तमिळनाडू प्रीमियर लीग आणि मग आयपीएलमधील कामगिरीच्या जोरावर त्याने भारतीय संघात स्थान मिळवले. आजच्या घडीला तो आयसीसीचा नंबर 1 टी20 गोलंदाज आहे. ही एक अविस्मरणीय गोष्ट आहे.”

वरुण चक्रवर्तीसाठी 2025 हे वर्ष निश्चितपणे उत्कृष्ट आणि आंतरराष्ट्रीय स्तरावर संघात त्याचे स्थान निश्चित करणारे ठरले आहे. वनडे असो वा टी20, जिथे जिथे संधी मिळाली तिथे त्याने शानदार कामगिरी केली. वरुणने यावर्षी ४ वनडे सामन्यात 10 बळी घेतले आहेत, तर 20 टी20 सामन्यात 36 बळी त्याच्या नावावर आहेत.

वरुण चक्रवर्तीची टी20 मधील कामगिरी 2026 च्या टी20 विश्वचषकापूर्वी भारतासाठी अतिशय सुखद बातमी आहे. या विश्वचषकाचे आयोजन भारत आणि श्रीलंका यांच्या संयुक्त यजमानपदाखाली फेब्रुवारी-मार्चमध्ये होणार आहे. दोन्ही देशांमधील खेळपट्ट्या फिरकीपटूंसाठी पोषक मानल्या जातात. वरुण चक्रवर्तीला ओळखणे जगभरातील फलंदाजांसाठी कठीण राहिले आहे. अशा परिस्थितीत, विश्वचषकात त्याच्याकडून करिश्माई कामगिरीची अपेक्षा आहे. वरुणने आतापर्यंत 33 टी20 सामन्यांत 55 बळी घेतले आहेत