Ratnagiri News – भरधाव डंपरची रिक्षाला जोरदार धडक; एकाचा जागीच मृत्यू, रिक्षाचालक गंभीर जखमी

खेड तालुक्यातील भरणे-खेड मार्गावर शनिवारी सायंकाळी झालेल्या भीषण अपघातात भरधाव डंपरने रिक्षाला मागून जोरदार धडक दिल्याने एका व्यक्तीचा जागीच मृत्यू झाला, तर रिक्षाचालक गंभीर जखमी झाला आहे. या घटनेमुळे परिसरात एकच खळबळ उडाली असून नागरिकांमध्ये हळहळ व्यक्त होत आहे.

भिलारे आयणी येथील संतोष भिलारे हे त्यांच्या रिक्षाने भरणेहून खेडच्या दिशेने जात होते. रिक्षा आठवडा बाजार परिसरात पोहोचली असता पाठीमागून भरधाव वेगाने आलेल्या डंपरने रिक्षाला जोरदार धडक दिली. धडकेची तीव्रता इतकी होती की रिक्षाचा मागील भाग पूर्णपणे चक्काचूर झाला.

या भीषण अपघातात रिक्षाचालक संतोष भिलारे गंभीर जखमी झाले असून त्यांना तातडीने उपचारासाठी रुग्णालयात दाखल करण्यात आले आहे. अपघातात एका व्यक्तीचा जागीच मृत्यू झाला. मात्र मृत व्यक्तीची ओळख अद्याप पटलेली नसून ती व्यक्ती रिक्षामध्ये प्रवास करत होती की रिक्षात बसण्यासाठी हात दाखवत असताना अपघात झाला, याबाबत निश्चित माहिती मिळालेली नाही.

घटनेची माहिती मिळताच स्थानिक नागरिकांनी तात्काळ मदतकार्य सुरू केले. जखमींना रुग्णालयात नेण्यासाठी मदत केली. घटनेनंतर रुग्णवाहिका आणि खेड पोलीस घटनास्थळी दाखल झाले. पोलिसांनी पंचनामा करून वाहतूक सुरळीत करण्यासाठी आवश्यक कार्यवाही केली. या अपघातामुळे भरणे-खेड मार्गावर काही काळ वाहतुकीचा खोळंबा झाला होता. अपघाताचे नेमके कारण, मृत व्यक्तीची ओळख आणि डंपर चालकाची जबाबदारी याबाबत खेड पोलीस अधिक तपास करत आहेत.