Ratnagiri News – प्रधानमंत्री सिल्वर कपमध्ये रत्नागिरीचे पोलीस अधीक्षक हिंदुस्तानात तिसऱ्या क्रमांकावर, AI चा वापर करून तयार केले रेडस् ॲप

पोलीस अधीक्षक नितीन बगाटे यांच्या संकल्पनेतून विकसित झालेल्या ‘रॅड्स’ ॲपचे सादरीकरण सरदार वल्लभभाई पटेल राष्ट्रीय पोलीस अकादमी हैदराबाद येथे करण्यात आले. ओळख पटू न शकलेल्या किंवा बेवारस व्यक्तीच्या प्रकरणातील उपलब्ध माहिती एकत्रित करून छायाचित्रे व अन्य माहितीच्या आधारे एआय तंत्रज्ञानाचा वापर करून चेहऱ्याची डिजिटल प्रतिकृती तयार करण्याची सुविधा या ॲपमध्ये आहे.

१५३ बेवारस प्रकरणांची नोंद

‘रॅड्स’ ॲपमध्ये आतापर्यंत १५३ बेवारस प्रकरणांची नोंद करण्यात आली आहे. त्यापैकी रत्नागिरी जिल्ह्यातील १३५ बेवारस व कुजलेल्या व्यक्तींच्या चेहऱ्यांच्या डिजिटल प्रतिकृती तयार करण्यात आल्या असून, १४ प्रकरणांमध्ये ओळख पटविण्यात यश आले आहे. जिल्ह्याबाहेरील १९ बेवारस प्रकरणांपैकी ७ प्रकरणांची ओळख या अॅपच्या माध्यमातून पटली आहे. याशिवाय ॲपमध्ये आतापर्यंत ३८१ बेपत्ता व्यक्तींची नोंद करण्यात आली असून, त्यापैकी रत्नागिरी जिल्ह्यातील ११ बेपत्ता व्यक्तींच्या चेहऱ्यांच्या डिजिटल प्रतिकृती तयार करून त्यांचा शोध घेण्यात यश आले आहे.

या ॲपच्या विकासामध्ये पोलीस अंमलदार अभिजीत दळवी (पोलीस तंत्रज्ञ), तसेच तंत्रज्ञ जितेश जैस्वाल आणि रितेश जैस्वाल यांनी महत्त्वपूर्ण तांत्रिक योगदान दिले आहे. पोलीस अधीक्षक नितीन बगाटे यांच्या दूरदृष्टीतून आणि अभिनव संकल्पनेला आधुनिक तंत्रज्ञानाच्या माध्यमातून प्रत्यक्ष कार्यप्रणालीचे स्वरूप देण्यात या विकास पथकाची महत्त्वपूर्ण भूमिका राहिली. अपर पोलीस अधीक्षक बी. बी. महामुनी यांच्या सहकार्याने तसेच पोलीस अधीक्षक नितीन बगाटे यांच्या संकल्पनेतून आणि विकास पथकाच्या तांत्रिक योगदानातून साकारलेले ‘रॅड्स’ ॲप पोलिस तपास अधिक सक्षम, गतिमान व परिणामकारक करण्याच्या दिशेने महत्त्वपूर्ण ठरत आहे.