रॉयल चॅलेंजर्स बंगळुरूने आयपीएल 2026 च्या पहिल्याच सामन्यात सनरायजर्स हैदराबादवर सहा गडी राखून शानदार विजय मिळवला. या विजयात देवदत्त पडिक्कल आणि विराट कोहली यांच्या आक्रमक फलंदाजीचा मोठा वाटा राहिला.
हैदराबादने दिलेल्या 202 धावांच्या लक्ष्याचा पाठलाग करताना बंगळुरूने 15.4 षटकांत 4 गडी गमावत 203 धावा करून सामना आपल्या नावावर केला. देवदत्त पडिक्कलने 26 चेंडूंमध्ये 61 धावांची झटपट खेळी केली, तर विराट कोहलीने 38 चेंडूंमध्ये नाबाद 69 धावा करत संघाला विजयाकडे नेले. या दोघांमध्ये दुसऱ्या गड्यासाठी केवळ 45 चेंडूंमध्ये 101 धावांची महत्त्वपूर्ण भागीदारी झाली.
फिल सॉल्ट लवकर बाद झाल्यानंतर कोहली आणि पडिक्कल यांनी आक्रमक फलंदाजी केली. बंगळुरू संघाने सुरुवातीलाच आक्रमक पवित्रा घेत 76 धावा केल्या आणि 8.1 षटकांत 100 धावांचा टप्पा पार केला.
सनराइजर्स हैदराबादचा कर्णधार म्हणून खेळणाऱ्या ईशान किशनने 38 चेंडूंमध्ये 80 धावांची तुफानी खेळी करत संघाला 201 धावांपर्यंत पोहोचवले. त्याने आपल्या खेळीत 8 चौकार आणि 5 षटकार लगावले. मात्र, इतर फलंदाजांकडून अपेक्षित साथ न मिळाल्यामुळे संघ मोठी धावसंख्या उभारू शकला नाही.
सामन्यानंतर ईशान किशनने पराभव मान्य करत संघाच्या कामगिरीवर प्रतिक्रिया दिली. त्याने सांगितले की सुरुवातीच्या काही षटकांनंतर खेळपट्टी फलंदाजीसाठी अनुकूल झाली होती, परंतु सुरुवातीला गमावलेले गडी संघाला महागात पडले. तसेच त्यांनी पुढील सामन्यांत शॉट निवड अधिक योग्य करण्यावर भर देण्याची गरज असल्याचे सांगितले.
देवदत्त पडिक्कलने जलद अर्धशतक पूर्ण करत गोलंदाजांवर वर्चस्व गाजवले. विराट कोहलीने अनुभवी शैलीत खेळ करत डावाची धुरा सांभाळली आणि अखेरीस संघाला विजय मिळवून दिला. विशेष म्हणजे शेवटच्या टप्प्यात कोहलीने आक्रमक फटकेबाजी करत सामना संपवला.
या विजयामुळे बेंगळुरू संघाने आयपीएल 2026 मध्ये विजयी सुरुवात केली असून संघाचा आत्मविश्वास वाढला आहे, तर हैदराबाद संघाला पुढील सामन्यांत सुधारणा करण्याची गरज भासणार आहे.
Comments are closed.