विश्वचषकात रिचा घोषची कमाल! या विक्रमात दोन दिग्गजांची बरोबरी करत इतिहास रचला

महिला एकदिवसीय विश्वचषकाच्या अंतिम सामन्यात भारताने दक्षिण आफ्रिकेचा 52 धावांनी पराभव केला. यासह, टीम इंडियाने पहिल्यांदाच महिला एकदिवसीय विश्वचषक विजेतेपद जिंकले. अंतिम सामन्यात भारताने 50 षटकात 298 धावा केल्या. शेेफाली वर्मा, दीप्ती शर्मा आणि रिचा घोष यांनी भारताला हा स्कोअर गाठण्यात महत्त्वाची भूमिका बजावली. अंतिम सामन्यात रिचाने 24 चेंडूत 34 धावा केल्या, ज्यामध्ये तीन चौकार आणि दोन षटकार मारले. या दोन षटकारांसह, रिचाने या विश्वचषकात मोठी कामगिरी केली.

या विश्वचषकात रिचा घोषने एकूण 12 षटकार मारले. यासह, तिने एकाच विश्वचषक आवृत्तीत सर्वाधिक षटकार मारण्याच्या बाबतीत डिआंड्रा डॉटिन आणि लिझेल ली यांच्याशी बरोबरी केली. दोघांनीही विश्वचषकाच्या एकाच आवृत्तीत 12 षटकार मारले आहेत. 2013 च्या विश्वचषकात वेस्ट इंडिजच्या डिआंड्रा डॉटिनने ही कामगिरी केली होती, तर 2017 मध्ये लिझेलने ही कामगिरी केली होती. 2017 च्या महिला विश्वचषकात हरमनप्रीत कौरने 11 षटकार मारले.

एका एकदिवसीय विश्वचषक हंगामात सर्वाधिक षटकार मारणाऱ्या फलंदाज

12 षटकार – रिचा घोष (2025)
12 षटकार – डिआंड्रा डॉटिन (2013)
12 षटकार – लिझेल ली (2017)
11 षटकार – हरमनप्रीत कौर (2017)
10 षटकार – नदीन डी क्लार्क (2025)

यंदाच्या महिला एकदिवसीय विश्वचषकात सर्वाधिक षटकार मारण्याचा विक्रम रिचा घोषच्या नावावर आहे. दक्षिण आफ्रिकेची नादिन डी क्लार्क दुसऱ्या क्रमांकावर आहे. तिने या वर्षी नऊ सामन्यांमध्ये 10 षटकार मारले. या यादीत स्मृती मानधना तिसऱ्या क्रमांकावर आहे. तिने नऊ सामन्यात नऊ षटकार मारले. ऑस्ट्रेलियाच्या फोबी लिचफिल्ड आणि दक्षिण आफ्रिकेच्या लॉरा वोल्वार्डने या विश्वचषकात प्रत्येकी सात षटकार मारले.

अंतिम सामन्यात, भारताने प्रथम फलंदाजी करत दक्षिण आफ्रिकेसाठी 299 धावांचे लक्ष्य ठेवले. भारताकडून शेफाली वर्माने सर्वाधिक 87 धावा केल्या, तर दीप्ती शर्माने 58 चेंडूत 58 धावा केल्या. प्रत्युत्तरात, दक्षिण आफ्रिकेचा संघ 246 धावांवर ऑलआउट झाला. दक्षिण आफ्रिकेची कर्णधार लॉरा वोल्वार्डने या सामन्यात 101 धावांची शतकी खेळी केली, परंतु तिचा डाव संघाला विजय मिळवून देऊ शकला नाही.