राजस्थान रॉयल्सचा कर्णधार झाल्यानंतर रियान परागची पहिलीच प्रेस कॉन्फरन्स! लहान मुलांच्या प्रश्नांना दिली मजेशीर उत्तरे

आयपीएल 2026 (IPL 2026) पूर्वी राजस्थान रॉयल्सने (RR) सर्वांना धक्का देत युवा अष्टपैलू रियान परागची (Riyan Parag) आपला नवीन कर्णधार म्हणून घोषणा केली आहे. संजू सॅमसनच्या (Sanju Samson) जागी आता रियान संघाचे नेतृत्व करेल. या निमित्ताने मुंबईत एका विशेष प्रेस कॉन्फरन्सचे आयोजन करण्यात आले होते, जिथे रियानने लहान मुलांच्या प्रश्नांना उत्तरे दिली.

एका मुलाने विचारले की, कॅप्टन होणे होमवर्कपेक्षा कठीण आहे का? यावर रियान हसून म्हणाला, “दोन्ही सारखेच आहेत!” त्याने सांगितले की त्याने आसामच्या घरगुती संघाचे नेतृत्व केले आहे, पण आयपीएलमध्ये नेतृत्व करणे हे एक वेगळे आणि मोठे आव्हान असेल.

रियान म्हणाला, जेव्हा मी 18 वर्षांचा असताना आयपीएल खेळायला सुरुवात केली, तेव्हापासूनच या संघाचे नेतृत्व करण्याचे माझे स्वप्न होते. मला कधीच दुसरी टीम बदलायची नव्हती. आज वयाच्या 24 व्या वर्षी हे स्वप्न पूर्ण होत असल्याचा मला खूप आनंद आहे. लोकांच्या टीकेबद्दल बोलताना तो म्हणाला की, सुरुवातीला मी लोकांचे ऐकायचो, पण आता मी कोणाकडेही लक्ष देत नाही. माझा स्वतःच्या तयारीवर पूर्ण विश्वास आहे. जेव्हा त्याला बेस्ट फ्रेंडबद्दल विचारले, तेव्हा त्याने ध्रुव जुरेल आणि यशस्वी जयस्वाल यांची नावे घेतली.

रियान गेल्या 7 वर्षांपासून राजस्थान रॉयल्ससोबत आहे. यापूर्वी शेन वॉर्न, राहुल द्रविड, स्टीव्ह स्मिथ आणि अजिंक्य रहाणे यांसारख्या मोठ्या खेळाडूंनी या संघाचे नेतृत्व केले आहे. प्रेस कॉन्फरन्सनंतर रियानने सर्व मुलांना ऑटोग्राफ दिले आणि त्यांच्यासोबत फोटोही काढले.