मेस्सी करणार फटकेबाजी! वानखेडेवर थराराचा अनोखा महासंगम; सचिन, विराट, रोहितसोबत क्रिकेट सामना

वानखेडे स्टेडियम पुन्हा एकदा इतिहास घडवण्यासाठी सज्ज होतोय. पण यावेळी क्रिकेटच्या मैदानात फटकेबाजी करणार आहे फुटबॉलचा जादूगार लिओनेल मेस्सी! जगभरातील फुटबॉलप्रेमींच्या हृदयावर राज्य करणारा मेस्सी ‘क्रिकेटची पंढरी’ असलेल्या मुंबईच्या वानखेडेवर क्रिकेटच्या मैदानात उतरणार असून त्याच्या समोर असतील हिंदुस्थानचे तीन दिग्गज – विराट कोहली, रोहित शर्मा आणि मास्टर ब्लास्टर सचिन तेंडुलकर. येत्या 14 डिसेंबरला होणाऱ्या या सेव्हन ए साइड मैत्रीपूर्ण क्रिकेट सामन्याचे आयोजन मोठय़ा थाटात करण्यात येणार आहे. क्रिकेट आणि फुटबॉल या दोन खेळांच्या महासंगमाचे हे अनोखे दृश्य पाहण्यासाठी देशविदेशातील चाहत्यांची मोठी गर्दी होण्याची शक्यता आतापासून वर्तवण्यात येत आहे.

2011 च्या विश्वचषक फायनलसारखा थरार अनुभवलेले वानखेडे स्टेडियम आता पुन्हा एका ऐतिहासिक क्षणाचा साक्षीदार ठरणार आहे. ते म्हणज गोल करण्यासाठी धावणारा मेस्सी  हातात बॅट धरून फलंदाजी करताना दिसेल. एवढेच नव्हे तर त्याच्या हातात गोलंदाजीसाठी चेंडूही असण्याची शक्यता आहे. हा ऐतिहासिक क्षण टिपण्यासाठी सारेच उत्सुक असतील.

कोलकातामध्ये होणार अभिमान सोहळा

मेस्सीच्या हिंदुस्थान दौऱ्याची सुरुवात कोलकातामधून होणार असून, ईडन गार्डन्स स्टेडियमवर भव्य सन्मान समारंभाचे आयोजन करण्यात आले आहे. या सोहळय़ात मुख्यमंत्री ममता बॅनर्जी यांची उपस्थिती अपेक्षित असून, मेस्सी कोलकात्यात लहान मुलांसाठी फुटबॉल वर्कशॉप व ‘फुटबॉल क्लिनिक’ सुरू करणार आहे. विशेष म्हणजे, त्याच्या सन्मानार्थ ‘उदय फुटबॉल स्पर्धा’ देखील आयोजित केली जाणार आहे.

केरळमध्ये अर्जेंटिना संघाचा अनुकूल सामना करा

मेस्सीच्या आगमनाचा उत्साह केवळ मुंबई आणि कोलकातापुरताच मर्यादित नाही. केरळच्या क्रीडामंत्र्यांनी आधीच हा कार्यक्रम जाहीर केला होता. त्यानुसार नोव्हेंबर महिन्यात अर्जेंटिना संघ ग्रीनफिल्ड इंटरनॅशनल स्टेडियम, तिरुअनंतपुरम येथे एक भव्य मैत्रीपूर्ण सामना खेळणार आहे. या आयोजनासाठी केरळ सरकार आणि आयोजकांमध्ये यशस्वी चर्चा पूर्ण झाली आहे.

14 वर्षांनंतर हिंदुस्थानी भूमीवर

मेस्सीने शेवटचा हिंदुस्थान दौरा 2011 मध्ये केला होता, जेव्हा त्याने कोलकाताच्या साल्ट लेक स्टेडियमवर वेनेझुएलाविरुद्ध सामना खेळला होता. तब्बल 14 वर्षांनंतर हिंदुस्थानात येणाऱ्या या फुटबॉल सम्राटाचे स्वागत यंदा अधिक भव्य आणि संस्मरणीय ठरणार आहे.

एक ऐतिहासिक उत्सव

क्रिकेट आणि फुटबॉल या दोन विश्वविजयी खेळांचे दिग्गज एकाच मैदानावर, एकाच वेळी, एका सामन्यासाठी उतरतील, हे दृश्य कदाचित पुन्हा कधीच पाहायला मिळणार नाही. त्यामुळे 14 डिसेंबरचा दिवस केवळ एक सामना नसेल, तर तो ठरेल हिंदुस्थानी क्रीडा क्षेत्रातील एक सुवर्णक्षण असेल. ज्याची चर्चा अनेक वर्षे होणार  आणि आठवणींच्या मैदानावर हा कायमचा कोरला जाईल.