गिल आणि सूर्याच्या खराब फॉर्मवर शिवम दुबेचं मोठं विधान, 'या' वेळी करणार जोरदार कमबॅक

भारत आणि दक्षिण आफ्रिका यांच्यात 5 सामन्यांची टी20 मालिका खेळली जात आहे. मालिकेत आतापर्यंत 3 सामने खेळले गेले आहेत. त्यापैकी 2 सामने भारताने जिंकले आहेत, तर 1 सामन्यात दक्षिण आफ्रिकेला विजय मिळाला आहे. भारतीय संघ मालिकेत 2-1 ने आघाडीवर आहे. चौथा सामना (17 डिसेंबर) रोजी लखनऊच्या इकाना स्टेडियममध्ये खेळला जाईल. या सामन्यापूर्वी, स्टार अष्टपैलू खेळाडू शिवम दुबे यांनी पत्रकार परिषद घेतली, ज्यात त्यांनी टीम इंडियाशी संबंधित अनेक प्रश्नांची उत्तरे दिली.

शिवम दुबे यांनी सूर्यकुमार यादव आणि शुभमन गिल यांच्या खराब फॉर्मवर मोठे विधान केले आहे. गिल आणि सूर्या लवकरच फॉर्मात परततील, असा त्यांचा विश्वास आहे. ते म्हणाले, “मला वाटते की शुभमन गिल असा खेळाडू आहे, ज्याचा फॉर्म वर-खाली होत असला तरी, त्याचे सरासरी आणि स्ट्राइक रेट खूप चांगले आहेत. तो गेल्या बऱ्याच काळापासून टीम इंडियासाठी चांगली कामगिरी करत आहे. प्रत्येक खेळाडूच्या कारकिर्दीत वाईट टप्पा येतोच, पण मला वाटते की गिल हा भारतातील सर्वोत्तम फलंदाज आहे.”

“सूर्या हा जगातील सर्वोत्तम फलंदाज आहे. जेव्हापासून तो खेळत आहे, तेव्हापासून त्याचे ‘प्लेअर ऑफ द मॅच’ पुरस्कार जवळपास विराट कोहलीइतकेच आहेत. त्यामुळे त्याच्या फलंदाजीवर शंका घेता येणार नाही. तो असा खेळाडू आहे जो आपल्या दमदार कामगिरीवर तुम्हाला अनेक सामने जिंकवून देऊ शकतो. मी त्याच्यासोबत बऱ्याच काळापासून खेळलो आहे. तो जगातील सर्वोत्तम खेळाडू आहे. तो नक्कीच पुनरागमन करेल.”