मोठा टप्पा गाठण्याच्या उंबरठ्यावर श्रेयस अय्यर; धोनी-कोहली-रोहितच्या ‘स्पेशल क्लब’मध्ये एंट्री पक्की

आयपीएल 2026 ची सुरुवात पंजाब किंग्सचा कर्णधार श्रेयस अय्यरसाठी अत्यंत शानदार ठरली आहे. त्याच्या नेतृत्वाखाली, पंजाब संघाने आपल्या पहिल्याच सामन्यात गुजरात टायटन्सचा तीन गडी राखून पराभव केला. या विजयासह, कर्णधार म्हणून आयपीएलमध्ये त्याच्या नावावर आता 49 विजय आहेत. आपला पुढील सामना जिंकून 50 विजयांचा टप्पा गाठण्याची संधी श्रेयस अय्यरकडे आहे. पंजाब किंग्सचा पुढील सामना 3 एप्रिल रोजी चेन्नई सुपर किंग्सविरुद्ध होणार आहे. जर श्रेयसने हा सामना जिंकण्यात यश मिळवले, तर तो आयपीएलमध्ये 50 सामने जिंकणाऱ्या कर्णधारांच्या ‘एलिट’ यादीत सामील होईल. ज्या यादीत धोनी आणि कोहलीसारख्या दिग्गजांचा समावेश आहे.

आयपीएल 2025 च्या अंतिम सामन्यानंतर, श्रेयस अय्यर पहिल्यांदाच एखादा टी20 सामना खेळत होता. गुजरात टायटन्सविरुद्धच्या सामन्यात त्याने एक छोटी पण आक्रमक खेळी साकारली. त्याने ११ चेंडूंमध्ये १८ धावा केल्या. १६३ धावांच्या लक्ष्याचा पाठलाग करताना, पंजाब संघाने शेवटच्या षटकात विजय निश्चित केला. पंजाब किंग्सचा कर्णधार श्रेयस आता आपल्या आयपीएल कारकिर्दीत कर्णधार म्हणून 50 विजयांचा टप्पा गाठण्यापासून केवळ एका विजयाच्या अंतरावर आहे. जर त्याने पुढील सामना जिंकला, तर तो विराट कोहली, एमएस धोनी, रोहित शर्मा आणि गौतम गंभीर यांसारख्या दिग्गजांच्या गौरवशाली यादीत सामील होईल.

कर्णधार म्हणून सर्वाधिक विजयांचा विक्रम एमएस धोनीच्या नावावर आहे. धोनीने 235 सामन्यांमध्ये 136 विजय मिळवले आहेत. रोहितच्या नेतृत्वाखाली, मुंबई इंडियन्सने 87 सामने जिंकले आहेत. गौतम गंभीरने आपल्या कर्णधारपदाच्या कार्यकाळात कोलकाता संघाला 71 विजय मिळवून दिले. कोहलीच्या नेतृत्वाखाली रॉयल चॅलेंजर्स बंगलोर संघाने 66 सामने जिंकले. रोहित आणि धोनी या दोघांनीही आपापल्या कर्णधारपदाच्या कार्यकाळात, आपापल्या संघांना प्रत्येकी पाच वेळा विजेतेपद मिळवून दिले आहे.