ICC चॅम्पियन्स ट्रॉफी 2025: श्रेयस अय्यर टीम इंडियाचा एक्स फॅक्टर कसा बनेल?

दिल्ली: बॉर्डर गावस्कर ट्रॉफीनंतर भारताच्या आगामी पांढऱ्या चेंडूंच्या मालिकेकडे सर्वांचे लक्ष लागले आहे. इंग्लंडविरुद्धच्या ODI आणि T20 मालिकेनंतर, भारताचे पुढील मोठे लक्ष्य ICC चॅम्पियन्स ट्रॉफी 2025 हे असेल. T20 विश्वचषक 2024 मध्ये विजेतेपद पटकावल्यानंतर, टीम इंडियाला आणखी एक ICC ट्रॉफी जिंकायची आहे.

आता प्रश्न पडतो की चॅम्पियन्स ट्रॉफीसाठी भारतीय संघ काय असेल. विशेषत: गतवर्षी एकदिवसीय प्रकारात श्रीलंकेविरुद्धची मालिका गमावल्यानंतर या वेळी संघाकडून अपेक्षा आणखी वाढल्या आहेत.

दबावाखाली डाव हाताळण्याची क्षमता

श्रेयस अय्यर त्याच्या शानदार फलंदाजीसाठी आणि दबावाखाली डाव हाताळण्याच्या क्षमतेसाठी ओळखला जातो. येत्या 19 फेब्रुवारीपासून सुरू होणाऱ्या आयसीसी चॅम्पियन्स ट्रॉफीमध्ये तो भारतासाठी महत्त्वाचा खेळाडू ठरू शकतो. टीम इंडियाची मधली फळी मजबूत करण्यात अय्यर मोठी भूमिका बजावू शकतो. विशेषत: फिरकी गोलंदाजीविरुद्ध, त्याचे तंत्र आणि कठीण परिस्थितीत डावाला गती देण्याची क्षमता त्याला विश्वासार्ह फिनिशर बनवते.

श्रीलंका दौऱ्यात शेवटचे खेळले

अय्यर ऑगस्टमध्ये श्रीलंका दौऱ्यावर भारताकडून शेवटचा खेळला होता. मात्र, त्या मालिकेत त्याला केवळ 38 धावा करता आल्या आणि त्याची सरासरी 12.66 होती. पण, त्यानंतर त्याने देशांतर्गत मोसमात उत्कृष्ट कामगिरी करत शानदार पुनरागमन केले.

2023 मध्ये मायदेशात झालेल्या एकदिवसीय विश्वचषकात चांगली कामगिरी करूनही श्रेयसला बीसीसीआयच्या केंद्रीय करार यादीतून वगळण्यात आले. याचे कारण त्याच्या शिस्तीशी संबंधित काही मुद्दे होते, ज्यामध्ये देशांतर्गत स्पर्धांमध्ये त्याची अनुपस्थिती देखील समाविष्ट होती.

ऑस्ट्रेलियातील बॉर्डर-गावस्कर करंडक स्पर्धेतील पराभवानंतर भारतीय संघ आता 2024 मध्ये टी-20 विश्वचषक जिंकल्यानंतर आपला वेग कायम ठेवण्यावर आणि आणखी एक आयसीसी विजेतेपदावर लक्ष केंद्रित करेल.

आकडेवारी काय सांगते?

श्रेयस अय्यरच्या नावावर 14 कसोटी, 62 एकदिवसीय आणि 51 टी-20 सामन्यांमध्ये एकूण 4,336 धावा आहेत. त्याची सरासरी 39.77 आणि स्ट्राइक रेट 96.57 आहे. यामध्ये सहा शतकांचाही समावेश आहे. 2023 एकदिवसीय विश्वचषक स्पर्धेत त्याने 530 धावा केल्या, ज्यामध्ये त्याची सरासरी 66.25 आणि स्ट्राइक रेट 113.24 होता.

देशांतर्गत क्रिकेटमध्येही अय्यरची कामगिरी उत्कृष्ट राहिली आहे. रणजी ट्रॉफीमध्ये त्याने चार सामन्यांमध्ये 452 धावा केल्या, ज्यामध्ये त्याची सरासरी 90.40 आणि स्ट्राइक रेट 88.80 होता. त्याची सर्वोच्च धावसंख्या 233 होती.

सय्यद मुश्ताक अली ट्रॉफी 2024 मध्येही त्याने चमकदार कामगिरी केली. नऊ सामन्यांमध्ये 345 धावा केल्या, ज्यामध्ये त्याची सरासरी 49.28 आणि स्ट्राइक रेट 188.52 होता. या स्पर्धेत त्यांच्या नेतृत्वाखाली मुंबईने विजेतेपद पटकावले.

विजय हजारे ट्रॉफीमध्येही श्रेयसने पाच सामन्यांत ३२५ धावा केल्या होत्या. पुद्दुचेरीविरुद्धच्या 137 धावांच्या नाबाद खेळीने मुंबईला 163 धावांनी मोठा विजय मिळवून दिला. कर्नाटकविरुद्ध 55 चेंडूत 114 धावांच्या स्फोटक खेळीने तो कोणत्याही फॉरमॅटमध्ये वर्चस्व गाजवू शकतो हे दाखवून दिले.

श्रेयस अय्यरचा अनुभव आणि कठीण परिस्थितीत कामगिरी करण्याची क्षमता त्याला मोठ्या स्पर्धांमध्ये महत्त्वाचा खेळाडू बनवते. त्याला चॅम्पियन्स ट्रॉफी 2025 च्या संघातून बाहेर ठेवणे ही भारतासाठी मोठी चूक ठरू शकते.

संबंधित बातम्या