शुबमन गिल खेळू इच्छित होता, मात्र निवड समितीचा वेगळाच प्लॅन; रिपोर्टमध्ये मोठा गौप्यस्फोट

यंदाच्या टी-20 विश्वचषकासाठी निवडलेल्या भारतीय संघातून शुभमन गिलची अनुपस्थिती आश्चर्यकारक होती. मुख्य निवडकर्ता अजित आगरकर यांनी गिलला वगळताना योग्य संयोजन निवडण्याचे महत्त्व अधोरेखित केले. गिलला या फॉरमॅटमध्ये धावा करण्यासाठी सातत्याने संघर्ष करावा लागत आहे. दक्षिण आफ्रिकेविरुद्धच्या तीन सामन्यांमध्ये तो फक्त 32 धावा करू शकला. खराब फॉर्म हे त्याच्या वगळण्याचे मुख्य कारण असल्याचे मानले जात होते. तथापि, आता एका अहवालातून धक्कादायक खुलासा झाला आहे.

पीटीआयच्या वृत्तानुसार, संघ व्यवस्थापन आधीच शुभमन गिलसाठी पर्यायांचा विचार करत होते. पायाच्या दुखापतीमुळे गिल लखनऊमध्ये होणाऱ्या चौथ्या टी-20 सामन्याला मुकण्याची अपेक्षा होती. त्यानंतर, त्याची दुखापत गंभीर नसली तरी त्याला अहमदाबादमधील अंतिम सामन्यात स्थान देण्यात आले नाही. यावरून स्पष्ट होते की निवडकर्ते त्याच्या समावेशाचा पुनर्विचार करत आहेत. अहवालात म्हटले आहे की, “बीसीसीआयच्या सूत्रांनुसार, संघ व्यवस्थापनाने आधीच उपकर्णधार गिलला वगळण्याचा निर्णय घेतला होता, जरी गिल अहमदाबाद सामना खेळू इच्छित होता कारण त्याची दुखापत गंभीर नव्हती.”

अहवालात असेही म्हटले आहे की वैद्यकीय पथकाला सुरुवातीला हेअरलाइन फ्रॅक्चर असल्याचा संशय होता, परंतु नंतर स्कॅनमध्ये फक्त किरकोळ दुखापत दिसून आली. गिल अहमदाबाद सामना वेदनाशामक औषधांसह खेळू शकला असता, परंतु संघाने त्याला मैदानात उतरवण्याचा निर्णय घेतला नाही.” शुबमन गिल गेल्या काही काळापासून त्याच्या खराब फॉर्ममुळे टीकेचा सामना करत आहे. सप्टेंबरमध्ये आशिया कप दरम्यान टी-20 संघात परतल्यापासून, त्याने 15 सामन्यांमध्ये फक्त 291 धावा केल्या आहेत. त्याची सरासरी 24.25 आहे आणि स्ट्राईक रेट 137.26 आहे. या काळात, त्याने एकही अर्धशतक किंवा शतक केलेले नाही.

एका माजी निवड समिती सदस्याने नाव न सांगण्याच्या अटीवर सांगितले की, अजित आगरकर यांच्या नेतृत्वाखालील निवड समितीला आपली चूक दुरुस्त करायची होती. त्यांच्या मते हा निर्णय निवडीपेक्षा जास्त मुख्य प्रशिक्षक गौतम गंभीर यांच्या विचारसरणीतील आणि निवड धोरणातील सातत्याच्या अभावाकडे बोट दाखवतो.

त्या माजी सेलेक्टरने पुढे म्हटले, “आशिया कपमध्ये इंग्लंडविरुद्धच्या कसोटीतील चांगल्या कामगिरीच्या आधारावर शुभमन गिलला उपकर्णधार बनवणे जर चुकीचा निर्णय होता, आणि संजू सॅमसनने कोणतीही चूक केलेली नव्हती, तर टी20 वर्ल्ड कपच्या अवघ्या पाच सामने आधी गिलला संघाबाहेर ठेवणे हे स्पष्टपणे ‘कोर्स करेक्शन’ म्हणजेच आधीच्या निर्णयात केलेली दुरुस्ती वाटते.”