Toothbrush Care: तुम्ही वापरत असलेला टूथब्रश बदलण्याची वेळ आली कसं समजाल?

दात आणि हिरड्यांचं आरोग्य राखण्यासाठी ब्रश करणे अत्यावश्यक आहे. सकाळी उठल्यावर आणि रात्री झोपण्याआधी ब्रश करणं ही सवय आपल्याला लहानपणापासूनच दिली जाते. पण बहुतेकजण एक गोष्ट दुर्लक्षित करतात ती म्हणजे टूथब्रश किती दिवस वापरणं योग्य आहे आणि तो बदलायची वेळ कशी ओळखायची. (signs to change your toothbrush on time)

खरंतर, टूथब्रश जितका जुना होतो, तितकाच तो दातांवर प्रभावीपणे काम करणं बंद करतो. त्यामुळे टूथब्रश वेळेवर बदलणं हे तोंडाच्या संपूर्ण स्वच्छतेसाठी अत्यंत महत्त्वाचं आहे.

दंततज्ज्ञ काय सांगतात?

अनेक दंततज्ज्ञ सांगतात की, प्रत्येक ३ ते ४ महिन्यांनी टूथब्रश बदलणं गरजेचं आहे. ब्रशचे ब्रिसल्स (ते केस) कालांतराने सैल, वाकडे, झिजलेले होतात. त्यामुळे ते दातांवरील प्लॅक किंवा अन्नकण नीट काढून टाकू शकत नाहीत. जर तुम्ही असा ब्रश वापरत असाल, तर तुम्ही तुमचं तोंड नीट स्वच्छ करत नाही, याचा थेट अर्थ असा होतो.

टूथब्रश बदलण्याची वेळ ओळखायची कशी?

1) ब्रिसल्सची झीज

ब्रशच्या ब्रिसल्स वाकलेले, झिजलेले किंवा फुटलेले दिसत असतील, तर तो ब्रश प्रभावीपणे वापरणं अशक्य आहे. अशा ब्रशचा उपयोग फक्त सवयीपुरता उरतो, परिणामकारकतेचा संबंध राहात नाही.

2) दुर्गंधी येणं

ब्रश धुवूनसुद्धा जर त्यातून दुर्गंधी येत असेल, तर ते संकेत आहे की ब्रशवर बॅक्टेरिया किंवा बुरशी वाढलेली आहे. अशा ब्रशचा वापर टाळणं आवश्यक आहे.

3) आजारपणानंतर लगेच बदल

तुम्ही सर्दी, ताप, घशात इन्फेक्शनसारख्या आजारातून सावरत असाल, तर जुन्या ब्रशमध्ये राहिलेली विषाणूंची अंशे पुन्हा तुमचं आरोग्य बिघडवू शकतात. त्यामुळे आजारपणानंतर ब्रश बदलणं आवश्यक आहे.

4) रंग फिकट होणं

अनेक ब्रश कंपन्या ब्रिसल्सला रंग देतात, जे काही आठवड्यांनी फिकट होतात. याला इंडिकेटर ब्रिसल्स म्हटलं जातं आणि ते ब्रश बदलण्याची वेळ ओळखण्यास मदत करतात.

5) वारंवार ब्रश वापरल्यावर तोंडात खरखर जाणवणं

ब्रश करताना जर हिरड्यांमध्ये वेदना होत असतील, किंवा दातांच्या जवळ तीव्र घासल्यासारखी भावना येत असेल, तर ब्रशचे केस फारसे कठीण झाले असण्याची शक्यता आहे. हेही बदल करण्याचे संकेत आहेत.

टूथब्रश योग्य प्रकारे सांभाळण्याच्या टिप्स

•ब्रश नेहमी वापरल्यानंतर कोरडा ठेवा. ओलसरपणा राहिल्यास त्यावर बॅक्टेरिया तयार होण्याची शक्यता वाढते.

•इतरांच्या ब्रशपासून लांब ठेवा.

•आठवड्यातून एकदा ब्रश गरम पाण्यात धुऊन स्वच्छ करा.

•प्लास्टिक ब्रशपेक्षा सॉफ्ट ब्रिसल्स असलेले ब्रश वापरणे फायदेशीर.

टूथब्रश हा तुमच्या तोंडाच्या आरोग्याचा पहिला रक्षक आहे. तुम्ही तो वेळेत बदलत नसाल, तर आरोग्याचा पहिला धोका तुमच्याच हातून निर्माण होतो. टूथब्रश फक्त दिसायला स्वच्छ असून उपयोग नाही, तर त्याचं कार्यक्षम असणं आवश्यक आहे. त्यामुळे नियमितपणे ब्रश बदलण्याची सवय लावा आणि तुमच्या तेजस्वी हास्याला कायमस्वरूपी संरक्षण द्या.