सिंगापूरचे राष्ट्रपती भारत दौऱ्यावर आले आहेत

पाच दिवशीय भेटीत पंतप्रधान, राष्ट्रपतींशी चर्चा, द्विपक्षीय संबंधांना नवा आयाम देण्याचा प्रयत्न

वृत्तसंस्था/ नवी दिल्ली

सिंगापूरचे राष्ट्रपती थर्मन षण्मुगरत्नम मंगळवारी रात्री पाच दिवसांच्या दौऱ्यावर नवी दिल्लीत पोहोचले. भारत आणि सिंगापूरमधील राजनैतिक संबंधांना 60 वर्षे पूर्ण झाल्याच्या निमित्ताने त्यांचा हा दौरा होत आहे. विविध क्षेत्रात भारत-सिंगापूर द्विपक्षीय संबंध अधिक मजबूत करण्याचे थर्मन यांचे उद्दिष्ट आहे.

थर्मन षण्मुगरत्नम आपल्या उच्चस्तरीय शिष्टमंडळासह नवी दिल्लीत आगमन झाल्यावर केंद्रीय मंत्री जितिन प्रसाद यांनी विमानतळावर त्यांचे स्वागत केले. सिंगापूरचे राष्ट्रपती म्हणून थर्मन षण्मुगरत्नम यांचा हा पहिलाच भारत दौरा आहे. गुरुवारी राष्ट्रपती भवनात थर्मन यांचे औपचारिक स्वागत करण्यात येणार आहे. स्वागतानंतर भारताच्या राष्ट्रपती द्रौपदी मुर्मू यांच्याशी तश चर्चा करतील. तसेच पंतप्रधान नरेंद्र मोदी यांचीही भेट घेतील.

सिंगापूरचे अध्यक्ष थर्मन षण्मुगरत्नम हे नवी दिल्ली येथे राजकीय भेटीवर आले आहेत. ‘भारत-सिंगापूर राजनैतिक संबंधांच्या 60 व्या वर्धापन दिनानिमित्त विशेष उत्सव,’ असे परराष्ट्र मंत्रालयाचे प्रवक्ते रणधीर जयस्वाल यांनी इन्स्टाग्रामवरील पोस्टमध्ये म्हटले आहे. थर्मन यांच्या भेटीमुळे द्विपक्षीय संबंधांना आणखी चालना मिळेल अशी अपेक्षाही परराष्ट्र मंत्रालयाने व्यक्त केली आहे. यापूर्वी पंतप्रधान नरेंद्र मोदी यांनी 4-5 सप्टेंबर 2024 रोजी सिंगापूरला भेट दिली होती. या भेटीदरम्यान व्यापक धोरणात्मक भागीदारीच्या पातळीवर पोहोचलेल्या द्विपक्षीय संबंधांना नवा आयाम देण्याचा प्रयत्न द्विपक्षीय नेतेमंडळी करणार आहेत.

ओडिशालाही भेट देणार

थर्मन षण्मुगरत्नम यांच्या या राजकीय भेटीमुळे भारत आणि सिंगापूरमधील राजनैतिक संबंधांच्या स्थापनेच्या 60 व्या वर्धापन दिनानिमित्त उत्सवाची सुरुवात होईल, असे परराष्ट्र मंत्रालयाने सांगितले. थर्मन यांचा दौरा पाच दिवसांचा असून ते  17 ते 18 जानेवारी दरम्यान ओडिशाचा दौरा करतील.

तरुण दास यांना मानद नागरिकत्व पुरस्कार

सिंगापूर-भारत संबंधांमध्ये अमूल्य योगदान दिल्याबद्दल सिंगापूरने भारतीय उद्योग महासंघाचे (सीआयआय) माजी महासंचालक तरुण दास यांना मानद नागरिकत्व पुरस्कार प्रदान केला आहे. नवी दिल्ली येथे बुधवारी झालेल्या एका कार्यक्रमात राष्ट्रपती थर्मन षण्मुगरत्नम यांनी दास यांना हा पुरस्कार प्रदान केला. मानद नागरिकत्व पुरस्कार हा सिंगापूर सरकारकडून देशाच्या विकासात आणि विकासात उल्लेखनीय योगदान दिल्याबद्दल सिंगापूरमधील गैर-सिंगापूर व्यक्तीला दिला जाणारा सर्वोच्च सन्मान आहे. तरुण दास यांनी गेल्या काही दशकांपासून सिंगापूर-भारत संबंधांच्या विकासात महत्त्वपूर्ण योगदान दिले आहे. तरुण दास यांनी 1993 मध्ये पहिल्यांदा भारताच्या ‘पूर्वेकडे पहा’ (लुक ईस्ट) धोरणाचा भाग म्हणून भारतीय उद्योगपतींच्या शिष्टमंडळाचे नेतृत्व केले होते.