सकाळी दिलेला शब्द, संध्याकाळी खरा करून दाखवला! वैभव सूर्यवंशीच्या आत्मविश्वासाबद्दल काय म्हणाले प्रशिक्षक?

आयपीएल 2025 स्पर्धेमध्ये सोमवारी (२८ एप्रिल) रोजी राजस्थान रॉयल्स आणि गुजरात टायटन्स दोन्ही संघांमध्ये सामना खेळवण्यात आला. या सामन्याद्वारे भारतीय क्रिकेटला नवा तारा मिळाला आहे. तो म्हणजे वैभव सूर्यवंशी. त्याने कालच्या त्याच्या शानदार प्रदर्शनानंतर जगाला त्याची दखल घ्यायला भाग पाडलं आहे. या 14 वर्षीय क्रिकेटपटूने गुजरातविरुद्धच्या सामन्यात ऐतिहासिक खेळी केली. केवळ आयपीएलच नव्हे तर त्याने टी-20 क्रिकेट जगतात एक ऐतिहासिक खेळी केली आहे. गुजरात टायटन्सविरुद्ध शतक झळकावून त्याने सर्वांचं लक्ष वेधून घेतलं. वैभवने फक्त 35 चेंडूत शतक झळकावत विश्वविक्रम केला. त्याच्या शतकाच्या जोरावर राजस्थान रॉयल्सने गुजरात टायटन्सवर 15.5 षटकांत 212 धावा करत विजय मिळवला.

वैभवने अशी खेळी करण्याचा निर्धार मैदानात उतरण्याच्या आधीच होता. असं त्याचे बालपणीचे प्रशिक्षक मनीष ओझा यांनी सांगितले आहे. ओझा म्हणाले, सोमवारी सकाळी १० वाजण्याच्या सुमारास मला वैभवचा फोन आला. फूटवर्क व फलंदाजीच्या तंत्राबद्दल आम्ही काही वेळ चर्चा केल्यानंतर वैभव खूप आत्मविश्वासाने म्हणाला, सर, आज मारेन. यावर मी त्याला म्हटलं, मार, पण लवकर बाद होऊ नकोस. शांत राहून संयमाने फलंदाजी कर. यशस्वीबरोबर बोलत राहा.

त्यानंतर रात्री वैभवने मैदानात काय केलं ते सगळ्यांनी पाहिलंच आहे. त्याने जयपूरच्या सवाई मानसिंह स्टेडियमवर उतरला अन् पहिल्या चेंडूपासूनच त्याने गोलंदाजांवर आक्रमण केलं. तब्बल 11 षटकार व 7 चौकारांच्या जोरावर त्याने शतकी खेळी केली. इशांत शर्मा, मोहम्मद सिराज, प्रसिद्ध कृष्णा, वॉशिंग्टन सुंदर, राशिद खान, करीम जनत या सर्वच गोलंदाजांची त्याने धुलाई केली.

ओझा म्हणाले, वैभव मला म्हणाला होता की मारेन, पण तो अशा पद्धतीने मारेल असं वाटलं नव्हतं. मी प्रामाणिकपणे सांगेन की इतकी मोठी ऐतिहासिक कामगिरी करेल असं वाटलं नव्हतं. तो केवळ 14 वर्षांचा आहे. मात्र देवाने त्याला अफाट प्रतिभा दिली आहे. त्याच्या या कारकिर्दीत मला छोटीशी भूमिका बजावता आली त्याबद्दल मी देवाचा खरोखर आभारी आहे.