टीम इंडियाचा स्फोटक सलामीवीर अभिषेक शर्मा सध्या सय्यद मुश्ताक अली ट्रॉफीमध्ये धमाकेदार कामगिरी करत आहे. बंगालविरुद्ध सुरू असलेल्या सामन्यात त्याने 12 चेंडूत वादळी अर्धशतक झळकावले. नंतर पुढील 20 चेंडूत त्याचे शतक पूर्ण केले. 12 चेंडूत अर्धशतक झळकावून अभिषेकने त्याचा मार्गदर्शक युवराज सिंगच्या विक्रमाशी बरोबरी केली आहे. 32 चेंडूत शतक झळकावून त्याने भारतासाठी टी20 मध्ये सर्वात जलद शतकांच्या यादीत ऋषभ पंतची बरोबरी केली आहे. या डावात अभिषेकचा स्ट्राइक रेट 300 पेक्षा जास्त झाला.
नाणेफेक जिंकून प्रथम फलंदाजी करण्याचा निर्णय घेणाऱ्या पंजाबने अभिषेक शर्मा आणि प्रभसिमरन सिंग यांच्यासोबत डावाची सुरुवात केली. प्रभसिमरन सिंगला देखील युवराज सिंगचे मार्गदर्शन आहे. या जोडीने बंगालच्या गोलंदाजांना धुडकावून लावले आणि पहिल्या 10 षटकात एकही विकेट न गमावता 163 धावा केल्या.
या धमाकेदार खेळीमुळे अभिषेकला टी20 मध्ये भारताकडून सर्वात जलद शतकांच्या यादीत दुसऱ्या स्थानावर आणले आहे. भारताकडून टी20 मध्ये सर्वात जलद शतक करण्याचा विक्रम उर्विल पटेलच्या नावावर आहे, त्याने गेल्या वर्षी याच स्पर्धेत त्रिपुराविरुद्ध 28 चेंडूत शतक झळकावले होते. उर्विल पटेलने या वर्षी सय्यद मुश्ताक अली ट्रॉफीमध्ये सर्व्हिसेसविरुद्ध 31 चेंडूत शतक झळकावले होते.
भारतासाठी टी20 मध्ये सर्वात जलद शतक करणारे फलंदाज (चेंडू)
उर्विल पटेल – २८
उर्विल पटेल – ३१
ऋषभ पंत – ३२
अभिषेक शर्मा – ३२
वैभव सूर्यवंशी – 32
भारतासाठी टी20 मध्ये सर्वात जलद अर्धशतक ठोकण्याचा विक्रम आशुतोष शर्माच्या नावावर आहे. 2023 मध्ये अरुणाचल प्रदेशविरुद्ध 11 चेंडूत अर्धशतक ठोकून आशुतोषने युवराज सिंगचा विक्रम मोडला.
भारतासाठी टी20 मध्ये सर्वात जलद अर्धशतक (चेंडू)
आशुतोष शर्मा – ११
युवराज सिंग – १२
अभिषेक शर्मा – १२
यशस्वी जयस्वाल – 13
Comments are closed.