रोमांचक सामन्यात दक्षिण आफ्रिकेचा विजय, बांगलादेशला शेवटच्या षटकात पराभूत करत विजयी हॅट्ट्रिक

महिला एकदिवसीय विश्वचषकातील 14वा सामना दक्षिण आफ्रिका आणि बांगलादेश यांच्यात खेळला गेला. या रोमांचक सामन्यात दक्षिण आफ्रिकेने शेवटच्या षटकात 3 विकेट्सने विजय मिळवला. प्रथम फलंदाजी करताना बांगलादेशने 50 षटकात 6 विकेट्स गमावून 232 धावा केल्या. प्रत्युत्तरात दक्षिण आफ्रिकेने 49.3 षटकात 7 विकेट्स गमावून हे लक्ष्य गाठले. या विश्वचषकातील दक्षिण आफ्रिकेचा हा सलग तिसरा विजय आहे.

नाणेफेक जिंकून प्रथम फलंदाजी करण्याचा निर्णय घेतल्यानंतर बांगलादेशच्या सलामी जोडीने पहिल्या विकेटसाठी 53 धावांची भागीदारी केली. सलामीवीर रुबाया हैदर 25 (52) धावांवर बाद झाली. त्यानंतर फरजाना हक 76 चेंडूत 30 धावा काढून बाद झाली. त्यानंतर कर्णधार निगार सुलताना 32 धावा काढून बाद झाली. शर्मिन अख्तरने संघाकडून 77 चेंडूत 50 धावा करत शानदार अर्धशतक झळकावले. या सामन्यात बांगलादेशकडून शोर्ना अख्तरने धमाकेदार खेळी केली, 35 चेंडूत 51 धावा केल्या. रितू मोनी 8 चेंडूत 19 धावा करून नाबाद राहिली. अशाप्रकारे बांगलादेशने 50 षटकांत 5 गडी गमावून 232 धावा केल्या. आफ्रिकन संघाच्या गोलंदाजीबद्दल बोलायचे झाले तर, नोनकुलुलेको म्लाबाने 2 बळी घेतले, तर क्लोई ट्रेयॉन आणि नादिन क्लार्कने प्रत्येकी 1 बळी घेतला.

233 धावांच्या लक्ष्याला उत्तर देताना दक्षिण आफ्रिकेची सुरुवात खराब होती. दुसऱ्या षटकात ताझमिन ब्रिट्स गोल्डन डकवर बाद झाल्यावर संघाला पहिला धक्का बसला. त्यानंतर लॉरा वोल्वार्ड आणि अ‍ॅन बॉश यांनी दुसऱ्या विकेटसाठी 55 धावांची भागीदारी केली. वोल्वार्डचा बाद होणे हा दक्षिण आफ्रिकेसाठी दुसरा धक्का होता. दुसऱ्या विकेटच्या सुरुवातीच्या नुकसानीनंतर दक्षिण आफ्रिकेचा डाव डळमळीत दिसत होता. 78 धावांच्या धावसंख्येवर पाच फलंदाज बाद झाले. त्यानंतर मॅरिझाने कॅप आणि क्लो ट्रायॉन यांनी डाव सावरला. कॅप 71 चेंडूत 56 धावा काढून बाद झाली. क्लो ट्रायॉनने 62 धावांची शानदार खेळी केली. नॅडिन क्लार्कने अखेर 29 चेंडूत 37 धावा करत संघाला विजय मिळवून दिला.