हॅलो, हॉटेलच्या 443 नंबरच्या रूममध्ये..; वैतागलेल्या सासऱ्याने फोनवरून दिली टिप, पोलिसांची धाड,

अहमदाबाद/सूरत: सासऱ्याने त्याच्या सुनेच्या आणि तिच्या मैत्रिणींच्या पार्टीला वैतागून पोलिसांना छापा टाकण्यासाठी ते दारू पार्टी करत असलेल्या ठिकाणाची माहिती दिली. गुजरातमधील सुरतमध्ये ही घटना समोर आली आहे. सुनेच्या दारूपार्ट्यांमुळे वैतागलेल्या एका सासऱ्याने पोलिसांना पार्टीची माहिती दिली. माहिती मिळाल्यानंतर पोलीस एका मोठ्या हॉटेलमध्ये पोहोचले तेव्हा तिथे दारू पार्टी सुरू होती. पोलिसांनी हॉटेलच्या खोलीतून चार तरुण आणि दोन महिलांना अटक केली. सासरच्यांनी सुनेच्या दारू पार्टीवर छापा टाकल्याचे हे प्रकरण चर्चेचा विषय बनले आहे. पोलिसांनी सर्व आरोपींविरुद्ध दारूबंदी असलेल्या राज्यात दारू पिल्याबद्दल गुन्हा दाखल केला आहे.

मोठ्या आलिशान हॉटेलातील रुममध्ये धाड

सून तिच्या मित्र मंडळींसह पार्टी करत असल्याची माहिती सासऱ्यानं पोलिसांना कळवली. यानंतर पोलिसांनी एका मोठ्या आलिशान हॉटेलातील रुममध्ये धाड टाकली. त्यावेळी तिथे दारु पार्टी सुरु असल्याचं पोलिसांच्या लक्षात आलं. फ्रेंडशिप डेच्या निमित्ताने सूरतमधील एका प्रतिष्ठित घराण्यातील सुनेने आपल्या मित्रमैत्रिणींसोबत एका आलिशान हॉटेलमध्ये दारू पार्टीचं आयोजन केलं होतं. मात्र, ही मजा फार काळ टिकली नाही. पोलिसांनी अचानक छापा टाकत पार्टीवर पाणी फेरलं आणि संबंधित महिलांना रंगेहात अटक केली.

महागड्या स्कॉच व्हिस्कीच्या बाटल्या

ही घटना डुमस बीचजवळील ‘हॉटेल वीकेंड अ‍ॅड्रेस’ येथे घडली. पोलिसांनी दिलेल्या माहितीनुसार, पार्टी रूम क्रमांक 443 मध्ये सुरू होती. पोलिसांनी मिळालेल्या गुप्त माहितीच्या आधारे छापा टाकला. तेव्हा पार्टीमध्ये मद्यपान चालू असल्याचं स्पष्ट झालं. पोलिसांनी कारवाईदरम्यान महागड्या स्कॉच व्हिस्कीच्या बाटल्या आणि सुमारे 2.55 लाख रुपयांचे सात स्मार्टफोन जप्त केले. विशेष म्हणजे, पार्टीमध्ये सहभागी असलेल्या कोणाकडेही दारू पिण्याचा परवाना नव्हता. पोलिस तपासात हे समोर आलं आहे की अटक करण्यात आलेल्या दोघी महिला व्यावसायिक कलाकार (Artists) आहेत. त्यातील एक महिला सूरतच्या एका मोठ्या व्यावसायिक घराण्याची सून आहे.

माझी सून तिच्या मित्रमंडळींसोबत हॉटेलमध्ये दारू पार्टी…

या प्रकरणात धक्कादायक बाब म्हणजे, सुनेच्या या दारू पार्टीची माहिती पोलिसांपर्यंत पोहचवणारा कुणी दुसरा नाही, तर तिचा सासरा होता. पोलिसांना मिळालेल्या गुप्त कॉलमध्ये एका इसमाने सांगितलं की, “माझी सून तिच्या मित्रमंडळींसोबत हॉटेलमध्ये दारू पार्टी करत आहे.” कॉलरने हॉटेलचं नाव, पार्टीचं ठिकाण आणि रूम नंबर 443 अशी सर्व माहिती पोलिसांना दिली. सासऱ्याला यापूर्वीही सुनेच्या दारू पार्ट्यांची माहिती मिळाली होती. त्यामुळे तो त्रस्त झाला होता. यावेळी त्याने थेट पोलिसांकडे धाव घेतली आणि कारवाई करण्यासाठी माहिती दिली.

कायदेशीर कारवाई सुरू

सूरत शहर पोलिसांचे एसीपी दीप वकील यांनी सांगितलं की, सर्व आरोपींची वैद्यकीय तपासणी करण्यात आली असून त्यांच्याविरोधात गुजरात मद्यनिषेध (संशोधन) अध्यादेश 2016 अंतर्गत कलम 66(1)(B), 65(A), 81 आणि 83(A) अन्वये गुन्हे दाखल करण्यात आले आहेत. पुढील तपास सुरू आहे. या प्रकरणामुळे सूरतमधील उच्चभ्रू समाजात खळबळ उडाली आहे.

आणखी वाचा