टी-20 विश्वचषकानंतर टीम इंडिया पुन्हा एकदा मैदानात उतरणार असून, पुढील एका वर्षात टीम अनेक मोठ्या मालिका खेळू शकते.

असे सांगण्यात येत आहे की श्रीलंका क्रिकेट बोर्डाने पूर मदत निधीसाठी तीन टी-20 सामन्यांची मालिका आयोजित करण्याचा प्रस्ताव ठेवला आहे, ज्याचा भारतीय क्रिकेट बोर्ड विचार करत आहे. इंग्लंड दौऱ्यापूर्वी आयर्लंडविरुद्ध तीन सामन्यांची टी-20 मालिका होण्याचीही शक्यता आहे.

जून महिन्यात भारतीय संघ अफगाणिस्तानविरुद्ध त्यांच्या घरच्या मैदानावर एक कसोटी आणि तीन एकदिवसीय सामने खेळणार आहे. यानंतर, सप्टेंबरमध्ये यूएईमध्ये अफगाणिस्तानविरुद्ध तीन टी-20 सामन्यांची मालिका होण्याची शक्यता आहे. त्याचबरोबर वेस्ट इंडिजविरुद्ध तीन एकदिवसीय आणि पाच टी-२० सामन्यांची मालिकाही खेळवली जाऊ शकते.

याशिवाय बांगलादेशविरुद्ध तीन एकदिवसीय आणि तीन टी-20 सामन्यांची मालिकाही प्रस्तावित आहे. मात्र, दोन्ही देशांच्या सरकारकडून मंजुरी मिळाल्यानंतरच ही मालिका शक्य होईल. झिम्बाब्वेविरुद्ध तीन टी-२० सामन्यांची छोटी मालिका खेळणार असल्याचीही चर्चा आहे.

वर्षाच्या अखेरीस आशियाई क्रीडा स्पर्धेनंतर भारतीय संघ न्यूझीलंडच्या दौऱ्यावर जाणार आहे. 18 ऑक्टोबरपासून सुरू होणाऱ्या या दौऱ्यात भारत आणि न्यूझीलंडमध्ये पाच एकदिवसीय, पाच टी-20 आणि दोन कसोटी सामने खेळले जाण्याची शक्यता आहे.

भारतीय संघ डिसेंबरच्या पहिल्या आठवड्यात मायदेशी परतेल, जिथे श्रीलंकेविरुद्ध तीन एकदिवसीय आणि तीन टी-20 सामन्यांची मायदेशी मालिका खेळवली जाऊ शकते. त्यानंतर जानेवारी-फेब्रुवारी 2027 मध्ये भारत आणि ऑस्ट्रेलिया यांच्यात बॉर्डर-गावसकर ट्रॉफी खेळली जाईल, ज्याची क्रिकेट चाहते आतुरतेने वाट पाहत आहेत.