आकाश चोप्रा यांनी भारतीय टी20 कर्णधारांची केली 'ब्लाईंड रँकिंग', जाणून घ्या कोण आहे कोणत्या क्रमांकावर

पुढील वर्षी भारत आणि श्रीलंकेत होणाऱ्या T20 वर्ल्ड कपसाठी विविध देशांनी आपापल्या संघांची घोषणा करण्यास सुरुवात केली असून, या मेगा इव्हेंटसाठी वातावरण निर्मिती सुरू झाली आहे. माजी क्रिकेटपटूंनीही वेगवेगळ्या पैलूंनी संघांचे पुनरावलोकन करण्यास सुरुवात केली आहे. माजी सलामीवीर आणि समालोचक आकाश चोप्राने आतापर्यंत या फॉरमॅटमध्ये राहिलेल्या भारतीय कर्णधारांना ‘ब्लाईंड रँकिंग’ दिली आहे. भारत हा T20 वर्ल्ड कपच्या इतिहासातील सर्वोत्तम संघांपैकी एक राहिला असून, यावेळी सूर्यकुमार यादव संघाचे नेतृत्व करणार आहे. एका आघाडीच्या वेबसाइटने नुकतेच चोप्रा यांना कामगिरीच्या आधारावर पहिल्या 5 भारतीय कर्णधारांची नावे सांगण्यास विचारले होते.

चोप्रा यांनी यामध्ये सर्वात आधी सध्याचा कर्णधार सूर्यकुमार यादव याला तिसऱ्या क्रमांकाचा भारतीय कर्णधार म्हणून निवडले. सूर्यकुमारला पहिल्यांदा 2023 मध्ये भारताचा कर्णधार बनवण्यात आले होते. त्यावेळी त्याला तात्पुरती जबाबदारी देण्यात आली होती, मात्र जुलै 2024 मध्ये यादवला पूर्णवेळ T20 कर्णधार घोषित करण्यात आले.

तसेच चोप्रा यांनी हार्दिक पांड्याला पाचव्या क्रमांकाचा कर्णधार सांगितले. रोहितच्या अनुपस्थितीत हार्दिकने कर्णधार म्हणून चांगली कामगिरी केली होती. 2024 च्या T20 वर्ल्ड कपपूर्वी हार्दिकला कर्णधारपद देण्यात आले होते. हार्दिक हा माजी कर्णधार रोहितची जागा घेण्यासाठी सर्वात प्रबळ दावेदार मानला जात होता. मात्र, जेव्हा रोहितने कर्णधारपद सोडले, तेव्हा अचानक सूर्यकुमार यादवचे नाव समोर आले आणि पांड्याचे चाहते थक्क झाले.

दुसरीकडे, चोप्रा यांनी पहिल्या क्रमांकावर दिग्गज महेंद्रसिंग धोनीला स्थान दिले आहे. धोनीच्याच नेतृत्वाखाली भारताने 2007 मध्ये पहिल्यांदा T20 वर्ल्ड कपवर कब्जा केला होता. तसेच, चोप्रा यांनी ब्लाईंड रँकिंगमध्ये विराट कोहलीला चौथ्या क्रमांकावर ठेवले आहे. विराटला कसोटी क्रिकेटमध्ये मोठे यश मिळाले, मात्र व्हाईट-बॉल फॉरमॅटमध्ये तसे होऊ शकले नाही. विराटने केवळ एकाच T20 वर्ल्ड कपमध्ये (2021) भारताचे नेतृत्व केले, परंतु त्यावेळी टीम इंडिया बाद फेरीतही पोहचू शकली नव्हती.

चोप्रा यांनी रँकिंग देताना, गेल्या वर्षी आपल्या नेतृत्वाखाली भारताला विश्वचषक जिंकून देणाऱ्या रोहित शर्माला दुसऱ्या क्रमांकावर ठेवले आहे.